လွေးပို့ဆပေ၊ မတ်လ ၂၉ ရက်
တရုတ်နိုင်ငံ ယူနန်ပြည်နယ်မှ လူ ၃၇ ဦးပါတဲ့ လူမှုကယ်ဆယ်ရေးအဖွဲ့နဲ့ ဆေးကုသရေးအဖွဲ့ဟာ ကူမင်း အပြည်ပြည်ဆိုင်ရာလေဆိပ်ကနေ မြန်မာနိုင်ငံမှ ငလျင်ဒဏ်သင့်သူတွေကို ကူညီဖို့ ရန်ကုန်မြို့သို့ ရောက်ရှိနေပြီလို့ သိရပါတယ်။
တရုတ်နိုင်ငံ ယူနန်ပြည်နယ် ကယ်ဆယ်ရေး ဆေးကုသမှုအဖွဲ့ဟာ အသက်ကယ်ကိရိယာ (Life detecto)၊ ငလျင်ကြိုတင်သတိပေးစနစ် (Earthquake early warning system)၊ ခရီးဆောင်ဂြိုလ်တု (Portable satellite)နဲ့ ဒရုန်းအပါအဝင် အရေးပေါ် ကယ်ဆယ်ရေးပစ္စည်းတွေ သယ်ဆောင်လာခဲ့တယ်လို့ တရုတ်သံရုံးက ထုတ်ပြန်ပါတယ်။
မူဆယ်မြို့မှာ နေထိုင်သူ အမျိုးသားတစ်ဦးက “အောက်ပြည်အောက်ရွာ အောက်ပိုင်းဖက်မှာ ကူညီမယ့်သူတွေက မနက် ၆ နာရီ ကတည်းက ဆင်းသွားပြီ လေယာဉ်နဲ့။ နန်းတော်ပေါက်ကနေ မူဆယ်ထဲကို ဝင်လာတဲ့ လူမူကယ်ဆယ်ရေးအဖွဲ့တွေကတော့ မူဆယ်က လူကြီးတွေနဲ့ တွေ့ဖို့ပါပဲ။ ဘယ်လိုကူညီရမလဲ စတာတွေနဲ့ ဆွေးနွေးဖို့ အဲလောက်ပဲ။ ကူညီပေးမယ့်သူတွေက လေယာဉ်နဲ့ ဆင်းသွားပြီ ၃၀ ကျော် ရှိတယ်” လို့ ပြောပါတယ်။
မနေ့ မတ်လ ၂၈ ရက် နေ့လယ်ပိုင်းက မြန်မာမှာ လှုပ်ခတ်ခဲ့တဲ့ ၇.၉ အဆင့်ရှိ ငလျင်ကြောင့် ထိခိုက်ပျက်စီးခဲ့တာတွေကိုကူညီဖို့ တရုတ်ဗဟိုအစိုးရက ယူနန်အာဏာပိုင်တွေကို ညွှန်ကြားထားတယ်လို့ သံရုံးက ထုတ်ပြန်ထားပါတယ်။
အလားတူ ရုရှားနိုင်ငံကလည်း လူမှုကယ်ဆယ်ရေးသမား၊ ဆရာဝန်နဲ့ စုစုပေါင်း လူ ၁၂၀ ဦးနဲ့အတူ အနံ့ခံခွေးတွေ ပါဝင်တဲ့ ကယ်ဆယ်ရေး လေယာဉ်နှစ်စီးကို ငလျင်ဒဏ် ခံရတဲ့သူတွေအတွက် ကယ်ဆယ်ရေးလုပ်ဖို့ ပို့ဆောင်လိုက်ကြောင်း ရုရှားနိုင်ငံ အရေးပေါ် ကယ်ဆယ်ရေး ဝန်ကြီးဌာနက သတင်းထုတ်ပြန်ပါတယ်။
ငလျင်ကြောင့် နိုင်ငံတစ်ဝှမ်းက အထပ်မြင့်အဆောက်အုံ၊ ဘာသာရေးကျောင်းနဲ့ သမိုင်းဝင် အဆောက်အအုံတချို့ ပြုကျတာတွေ ရှိသလို လူထု ထိခိုက်သေဆုံးတာနဲ့ ဒဏ်ရာရသူ များနေပြီး အရေအတွက်အတိအကျကိုတော့ မသိနိုင်သေးပါဘူး။
