ရွှေဖီမြေ၊ မတ်လ ၂၈ ရက်၊ နေပြည်တော်
မြန်မာ့သမိုင်းမှာ အကြမ်းဖက်လမ်းစဉ် ကျင့်သုံးပြီး အကျပ်ကိုင် တောင်းဆိုခဲ့တဲ့ ဖြစ်စဉ်တိုင်းမှာ စစ်တပ်အနေနဲ့ အလျှော့ပေး လက်ခံခဲ့ပေးတဲ့ အစဉ်အလာ မရှိဘူးလို့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောကြားခဲ့ပါတယ်။
မနေ့ မတ်လ ၂၇ ရက်မှာ ကျရောက်တဲ့ ၈၀ နှစ်ပြည့် တပ်မတော်နေ့မှာ စစ်ခေါင်းဆောင်က အခုလို ပြောကြားခဲ့တာပဲ ဖြစ်ပါတယ်။
ဒို့တာဝန် အရေးသုံးပါးကို ထိပါးလာတဲ့ လက်နက်ကိုင် အကြမ်းဖက်တဲ့ လမ်းစဉ်ကို လက်ခံလို့ မရတာကြောင့် စစ်ကောင်စီအနေနဲ့ တရားသောစစ်ကို ဆက်လက် ဆင်နွှဲသွားမယ်လို့ စစ်ခေါင်းဆောင်က ပြောကြားခဲ့ပါတယ်။
တိုင်းရင်းသား လက်နက်ကိုင်အဖွဲ့အပြင် ပြည်သူ့ကာကွယ်ရေးတပ်- PDF တွေအနေနဲ့ လက်နက်ကိုင်တဲ့ လမ်းစဉ်ကို စွန့်လွတ်ပြီး ရွေးကောက်ပွဲလမ်းကြောင်းကနေဝင်ပြီး နိုင်ငံရေးပြဿနာကို ဖြေရှင်းဖို့ ဖိတ်ခေါ်ကြောင်း ဆက်လက် ပြောဆိုခဲ့ပါတယ်။
လာမယ့် ဒီဇင်ဘာလနဲ့ ၂၀၂၆ ခုနှစ် ဇန်နဝါရီလထဲ ရွေးကောက်ပွဲ ပြုလုပ်ပြီး အာဏာ လွှဲပြောင်းပေးမယ်လို့ စစ်ခေါင်းဆောင်က ထုတ်ဖော်ပြောဆိုထားပါတယ်။
အမျိုးသား ညီညွတ်ရေးအစိုးရ- NUG အပါအဝင် တော်လှန်ရေး အင်အားစုတွေကတော့ စစ်ကောင်စီ ကျင်းပမယ့် ရွေးကောက်ပွဲကို လက်မခံကြောင်း ထုတ်ပြောထားပါတယ်။
လက်ရှိ နိုင်ငံတဝန်းမှာ စစ်ကောင်စီတပ်ဟာ တော်လှန်ရေးအင်အားစုတွေရဲ့ တိုက်ခိုက်တာကို ခံနေရပြီး နိုင်ငံတဝန်းမှာ မြို့ပေါင်း ၉၀ ကျော် လက်လွှတ်ဆုံးရှုံးထားရပါတယ်။
