အိုက်ပွီး၊ မတ်လ ၂၈ ရက်၊ ဂန့်ဂေါ
မကွေးတိုင်း ဂန့်ဂေါမြို့မှာ ဈေးသည်တွေ ဈေးရောင်းချခွင့်နဲ့ ကားပိုင်ရှင်၊ ကားသမားတွေ ကားပြေးဆွဲခွင့် စစ်ကောင်စီတပ်က ကန့်သတ်လိုက်ပြီး ထောင်ဒဏ် ၆ လအထိ ချမှတ်နိုင်တဲ့ ဒေသန္တရအမိန့်ကို ထုတ်ပြန်လိုက်တယ်လို့ ဒေသခံတွေဆီက သိရပါတယ်။
မနေ့ မတ်လ ၂၇ ရက် မနက်ပိုင်းက ဂန့်ဂေါမြို့ ခလရ ၅၀ တပ်ရင်းထဲ ဈေးသည်နဲ့ ကားပိုင်ရှင်တွေကို စစ်ကောင်စီတပ် ခေါ်ယူတွေ့ဆုံပြီး အခုလို ကန့်သတ်လိုက်တာ ဖြစ်ပါတယ်။
ဈေးသည်တွေအနေနဲ့ ဈေးရောင်းချရာမှာ မိသားစုဝင်တစ်စုကို တစ်ပတ်စာထက် ပိုမိုမရောင်းချဖို့နဲ့ တစ်ပတ်စာထက် ပိုမိုရောင်းချတာ တွေ့ရှိရင် ဈေးရောင်းသူကို စစ်ကောင်စီက ထောင်ဒဏ် ၆ လ ချမှတ်မယ်လို့ သိရပါတယ်။
“အရင်ဆုံး ဈေးသည်တွေနဲ့ တွေ့ဆုံပါတယ်။ အဲမှာ ဈေးသည်တွေ ဈေးရောင်းတဲ့အခါ မိသားစုတစ်စုကို တစ်ပတ်စာ ရောင်းချဖို့ ပြောတယ်။ တစ်ပတ်စာထက် မရောင်းချဖို့။ အကယ်လို့ တစ်ပတ်စာထက် ရောင်းချတာ တွေ့ရှိရင် ထောင်ဒဏ် ၆ လ ချမှတ်မယ်လို့ အစည်းအဝေးမှာ ပြောပါတယ်” လို့ ဂန့်ဂေါမြို့မှ ဈေးသည်တစ်ဦးက ရွှေဖီမြေသို့ ပြောပါတယ်။
မလိုက်နာရင် ဈေးဆိုင်နဲ့ ဆိုင်ထဲ ရှိတဲ့ပစ္စည်းအားလုံးကိုလည်း သိမ်းဆည်းသွားမယ်လို့ စစ်ကောင်စီဘက်က ပြောဆိုထားပါတယ်။
အလားတူ ကားပိုင်ရှင်၊ ကားသမားတွေကိုလည်း ဂန့်ဂေါမြို့အပြင် တခြားကျေးရွာတွေမှာ ပစ္စည်းသယ်ဆောင်တာ၊ ဈေးရောင်းချတာတွေ မပြုလုပ်ဖို့နဲ့ တွေ့ခဲ့ရင် ထောင်ဒဏ် ၆ လ ချမှတ်ပြီး ကားတွေ သိမ်းဆည်းသွားမယ်လို့ ဆိုပါတယ်။
“မြို့ထဲကလွှဲရင် ပစ္စည်းသယ်တာတွေ၊ ရောင်းတာတွေ မလုပ်ဖို့ ပြောတာပါ။ အဲလိုလုပ်ရင် ဖမ်းဆီးထောင်ချမယ်။ ကားတွေ သိမ်းမယ်ပြောတယ်။ ပြီးတော့ ပစ္စည်းရောင်းချတဲ့ ကျေးရွာတွေကိုလည်း လက်နက်ကြီးကျည်တွေ ဒရုန်းတွေ ပစ်ခတ်သွားမယ်လို့ပြောတယ်” လို့ ဂန့်ဂေါမြို့နယ်မှ ကားပိုင်ရှင်တစ်ဦးက ရွှေဖီမြေသို့ ပြောပါတယ်။
စစ်ကောင်စီတပ်က PDF တပ်ဖွဲ့ထံ ကုန်ပစ္စည်း၊ စားသောက်ကုန် မရောက်ဖို့အတွက် ဈေးသည်တွေကို ဈေးရောင်းချခွင့်နဲ့ ကားပိုင်ရှင်၊ ကားသမားတွေ ကားပြေးဆွဲခွင့် ကန့်သတ်လိုက်တာလို့ ဒေသခံတွေက သုံးသပ်ပါတယ်။
