အင်းငယ်၊ မတ်လ ၂၇ ရက်၊ ဆီဆိုင်
ရှမ်းတောင် ပအိုဝ်းဒေသ ဆီဆိုင်မြို့မှာ ပြည်သူ့စစ်သင်တန်း တက်ရောက်သူတွေက ကျည်ဆံဖိုး ပြန်ထည့်နေရတယ်လို့ ဒေသတွင်း စစ်မှုထမ်း အကြုံးဝင်သူ လူငယ်တွေက ပြောပါတယ်။
ဆီဆိုင်မြို့ ဘုရားဖြူဘောလုံးကွင်းမှာ စစ်ကောင်စီ လက်အောက်ခံ ပအိုဝ်းပြည်သူ့စစ်- PNA က လစဉ် စစ်သင်တန်း ပေးနေပြီး တက်ရောက်ကြတဲ့ လူငယ်တစ်ဦးချင်းဆီကနေ ကျည်ဆံဖိုး ပြန်လည် ကောက်ခံနေတာပဲ ဖြစ်ပါတယ်။
သင်တန်း တက်ရောက်သူနဲ့ နီးစပ်သူ အမျိုးသားတစ်ဦးက “သူတို့ သတ်မှတ်ထားတဲ့ ပစ်မှတ် မထိရင် ပိုက်ဆံ ထည့်ပြီး ထပ်ပစ်ရတယ်။ ဆယ်ချက်ကတော့ အလကား ပေးပစ်တယ်။ ဆယ်ချက်နဲ့ ပစ်မှတ် ထိဖို့က ဘယ်လိုမှ မဖြစ်နိုင်ဘူး။ အကုန်လုံးနီးပါး ထည့်ရတယ်” လို့ ပြောပါတယ်။
PNA က ကျည်ဆံဖိုးအနေနဲ့ တစ်လုံးကို ၁,၅၀၀ ကျပ်နှုန်းနဲ့ ကောက်ခံနေပြီး သင်တန်း တက်ရောက်သူ တစ်ဦးကို ၁၀ လုံးနှုန်းနဲ့ အနည်းဆုံး ထည့်ဝင်ပေးနေရတယ်လို့ သိရပါတယ်။
PNA ဖွင့်လှစ်တဲ့ စစ်သင်တန်းမှာ အသက် ၁၈ နှစ်ကနေ ၄၀ နှစ်အတွင်း အမျိုးသားတွေက တစ်ရွာကို ၁၀ ဦးနှုန်းနဲ့ တက်ရောက်ရပြီး သင်တန်း တစ်ကြိမ်မှာ လူဦးရေ ၃၀၀ ဝန်းကျင်အထိ ပါဝင်ကြတယ်လို့ ဆိုပါတယ်။
သင်တန်း တက်ရောက်သူရဲ့ မိသားစုဝင်တစ်ဦးက “ဘယ်သူမှတော့ မတက်ချင်ပါဘူး။ သူတို့ဆီတက်ရင် ဗမာစစ်တပ်က စစ်မှုထမ်း မခေါ်ဘူးဆိုလို့ တက်ကြတာ။ သင်တန်းပြီးရင် ကတ်ပေးတယ်။ တချို့သူဌေးတွေက ပိုက်ဆံပေးပြီး ကတ်ဝယ်တယ်။ ကျည်ဆံဖိုးက မကောက်တဲ့ရက် မရှိဘူး။ မရှိလည်း ထည့်ရတာပဲ” လို့ ပြောပါတယ်။
သင်တန်းကာလအနေနဲ့ တစ်လ သတ်မှတ်ထားပြီး လစဉ် မဲနှိုက်ရွေးချယ်တာကြောင့် ဒေသတွင်း လူငယ်တွေ တိမ်းရှောင်နေရသလို အင်အားပြပွဲ နီးကပ်တဲ့ ရက်တွေမှာလည်း ရွာလုံးကျွတ်က အမျိုးသားကို ၃ ရက်နဲ့အပြီး စစ်သင်တန်း ပေးတာတွေ ရှိတယ်လို့ သိရပါတယ်။
အလားတူ ညောင်ရွှေမြို့နယ် ပုံမူရွာမှာလည်း ဖေဖော်ဝါရီ ၁၁ ရက်က စစ်အင်အား ၈၀၀ ကျော်နဲ့ PNA က စစ်သင်တန်းဆင်းပွဲ ပြုလုပ်ခဲ့ပြီး သင်တန်းဆင်းလာသူအားလုံးကို ရှေ့တန်း ပို့ဆောင်လိုက်တာကြောင့် မိသားစုဝင်တွေက စိုးရိမ်ပူပန်နေကြရပါတယ်။
