မိုင်းရူပ၊ မတ်လ ၂၇ ရက်၊ စဉ့်ကူး
ပြည်သူ့ကာကွယ်ရေးတပ်မတော်(မန္တလေး)- MDY PDF နဲ့ ပူးပေါင်းတပ်တွေ ထိန်းချုပ်ထားတဲ့ မန္တလေးတိုင်း စဉ့်ကူးမြို့နယ်မှာရှိတဲ့ ရွှေလုပ်ကွက်တွေကို စစ်ကောင်စီတပ်က ပစ်မှတ်ထားပြီး လေကြောင်း တိုက်ခိုက်မှု ပြုလုပ်လာနေတယ်လို့ သိရပါတယ်။
စဉ့်ကူးမြို့နယ်ကို မန္တလေး PDF နဲ့ ပူးပေါင်းတပ်တွေ ထိန်းချုပ်ပြီးနောက် စစ်တပ်ဘက်က တော်လှန်ရေးအင်အားစုတွေ အခွန် မရအောင် ရွှေလုပ်ကွက်တွေကို ပစ်မှတ်ထားပြီး တိုက်ခိုက်နေတာဖြစ်တယ်လို့ စဉ့်ကူးမြို့နယ်မှာ ရှိနေသူတစ်ဦးက ရွှေဖီမြေကို ပြောပါတယ်။
“စကစက အဓိက ရွှေလုပ်ကွက်တွေ ပစ်မှတ်ထားပြီး ဗုံးကြဲတာ။ ထိခိုက်သေဆုံးမှုလည်း များတယ်။ သတင်းတွေလည်း ရှိနေတော့ နေရာက အတိအကျပဲ”
ပြီးခဲ့တဲ့ မတ်လ ၂၄ ရက် ည ၈ နာရီခွဲကနေ ၉ နာရီခွဲအတွင်း စစ်တပ်ဟာ ဂျက်ဖိုက်တာ ၅ စီး အသုံးပြုပြီး စဉ့်ကူးမြို့နယ် မာလဲနတ်တောင်ဆည်၊ ဇိုက်ချောင်းရွာ၊ ထောက်ကြံ့ပင်ရွာနဲ့ ကံတောင်ရွာကို လေကြောင်းနဲ့ ဗုံးကြဲတိုက်ခိုက်ခဲ့တယ်လို့ မန္တလေး PDF က ထုတ်ပြန်ထားပါတယ်။
စစ်တပ်ဟာ ဒေသခံတွေ အလုပ် လုပ်နေတဲ့ သယံဇာတလုပ်ငန်းတချို့ကို ပစ်မှတ်ထားပြီး လေကြောင်း တိုက်ခိုက်မှု ပြုလုပ်နေတာ တွေ့ရတယ်လို့ မန္တလေး PDF က ပြောဆိုပါတယ်။
ဗုံးကြဲတိုက်ခိုက်မှုကြောင့် အမျိုးသား ၁ ဦးနဲ့ အမျိုးသမီး ၁ ဦး ထိခိုက်ဒဏ်ရာ ရခဲ့ပြီး အဆောက်အဦး အများစု ပျက်စီးခဲ့ပါတယ်။
ဒါ့အပြင် ပြီးခဲ့တဲ့ မတ်လ ၁၄ ရက်နဲ့ ၁၇ ရက်မှာ စစ်တပ်က စဉ့်ကူးမြို့နယ် လက်ပံလှရွာကို လေကြောင်းနဲ့ တိုက်ခိုက်ရာ သေဆုံးသူ ၃၀ ကျော်နဲ့ ဒဏ်ရာရသူ များခဲ့ပါတယ်။
တော်လှန်ရေးအင်အားစုတွေ ထိန်းချုပ်ထားတဲ့ နယ်မြေမှာ နိုင်ငံပိုင် သယံဇာတတွေကို ဥပဒေမဲ့ ထုတ်ယူနေမှုအပေါ် အရေးယူသွားမယ်လို့ စစ်ကောင်စီက ပြီးခဲ့တဲ့ ဖေဖော်ဝါရီ ၂၁ ရက်မှာ ထုတ်ပြန်ပြီးနောက် တော်လှန်ရေး အင်အားစုတွေ ထိန်းချုပ်ဒေသက သယံဇာတ လုပ်ကွက်ကို ပစ်မှတ်ထားပြီး လေကြောင်းနဲ့ တိုက်ခိုက်နေပါတယ်။
