မိုင်းရူပ၊ မတ်လ ၂၇ ရက်၊ သပိတ်ကျင်း
မန္တလေးတိုင်း သပိတ်ကျင်းမြို့နယ် ၇ မိုင်ကျေးရွာမှာ စစ်ကောင်စီတပ်နဲ့ တော်လှန်ရေး အင်အားစုတို့အကြား တိုက်ပွဲ ဆက်လက် ပြင်းထန်နေပြီး စစ်တပ်ဘက်က စစ်အင်အား ဖြည့်တင်းနေတယ်လို့ ရှေ့တန်း စစ်မြေပြင်မှာ ရှိနေသူတွေက ပြောပါတယ်။
တအာင်းတပ်မတော်- TNLA၊ မိုးကုတ်ဗျူဟာနဲ့ မန္တလေး PDF ပူးပေါင်းတပ်နဲ့ စစ်တပ်တို့အကြား တိုက်ပွဲ ပြင်းထန်နေတာပဲ ဖြစ်ပါတယ်။
“တိုက်ပွဲကတော့ နေ့တိုင်းလိုလို ဖြစ်နေတယ်။ စစ်ကောင်စီဘက်က ဝေဟင်ရော၊ မြေပြင်ကနေရော စစ်အင်အားတွေ ဖြည့်နေတယ်။ ဒီနေ့(မတ်လ ၂၇ ရက်) မနက်လည်း တိုက်ပွဲတွေ ပြင်းထန်နေတယ်” လို့ ၇ မိုင်ရွာ စစ်မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
သပိတ်ကျင်းမြို့ကို ပြီးခဲ့တဲ့ ၂ဝ၂၄ ဩဂုတ် ၃၀ ရက်မှာ တော်လှန်ရေး အင်အားစုတွေက တိုက်ခိုက်သိမ်းပိုက်နိုင်ခဲ့တာဖြစ်ပြီး စစ်ကောင်စီရဲ့ ၇ မိုင်တပ်စခန်း၊ ကျောက်ကြီးတပ်စခန်းနဲ့ တန်းမြင့်လေ့ကျင့်ရေးကျောင်း အမှတ် ၁၃ တပ်တို့ ကျန်ရှိနေတာ ဖြစ်ပါတယ်။
ရှမ်းမြောက် မိုးမိတ်နဲ့ မန္တလေးတိုင်း မိုးကုတ်မြို့ကို TNLA သိမ်းပိုက်ပြီးနောက် မိုးမိတ်၊ မိုးကုတ်ကနေ ထွက်ပြေးသွားတဲ့ စစ်ကောင်စီတပ်ဖွဲ့ဝင်ကလည်း ၇ မိုင်ရှိ စစ်တပ်နဲ့ သွားရောက် ပူးပေါင်းနေတာ ဖြစ်ပါတယ်။
စစ်တပ်ဘက်ကတော့ သပိတ်ကျင်းမြို့နယ်က တိုက်ပွဲနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
