လွေးထွေး၊ မတ်လ ၂၆ ရက်၊ နမ့်ဆန်
တအာင်းဒေသ နမ့်ဆန်မြို့နယ်က ကျေးရွာတချို့မှာ ရွှေဖီဦး လက်ဖက်ရွက်စိမ်း တစ်ပိဿာကို ၄ ထောင်နဲ့ စတင် ဝယ်ယူနေပြီဖြစ်ကြောင်း လက်ဖက်တောင်သူတွေက ပြောပါတယ်။
မတ်လ တတိယအပတ်ကစပြီး ရွှေဖီဦး လက်ဖက်ရွက်စိမ်းကို နမ့်ဆန်မြို့နယ် ကွမ်ဟယ်နဲ့ မြို့သစ်ကျေးရွာအုပ်စုမှာ ၄ ထောင်ကျပ်နဲ့ ဝယ်နေတာ ဖြစ်ပါတယ်။
မြို့သစ်ရွာမှ လက်ဖက်တောင်သူ အမျိုးသမီးက “ရွှေနှင်းဆီ စက်ရုံက ဝယ်တာ တစ်ပတ်ကျော်လောက်ရှိပြီ။ လောလောဆယ် ၃,၅၀၀ တော့ ဈေးဖြတ်ထားပေးတယ်။ နောက်တခြားနေရာက ဈေးပိုပေးရင် ပြန်တိုးပေးမယ်လို့ပြောတယ်။ အခုတော့ လေးထောင် ပြန်ပေးမယ်လို့ပြောတယ်” ဆိုပြီး ရွှေဖီမြေသို့ ပြောပါတယ်။
ဒီနှစ် ရွှေဖီလက်ဖက်ဈေးဟာ ၄ ထောင်ကျပ်ဝန်းကျင် ရပေမဲ့ ၅ ဆကျော် မြှင့်တက်နေတဲ့ ကုန်ဈေးနှုန်းနဲ့ နှိုင်းယှဉ်ရင် လူထုတွေအတွက် တွက်ချေ မကိုက်သေးကြောင်း ပြောဆိုကြပါတယ်။
နမ့်ဆန်မြို့နယ်မှ လက်ဖက်တောင်သူ အမျိုးသားတစ်ဦးကလည်း “အခုရွာမှာ စပေးတာက ၃,၈၀၀ လောက်ပေါ့။ ဒါပေမဲ့ မကိုက်ဘူး ခရမ်းချဉ်သီး တစ်ပိဿာတောင် မရဘူး။ ခရမ်းချဉ်သီး တစ်ပိသာက ၆ ထောင် ဖြစ်နေပြီ။ ငွေ ဖောင်းပွလို့လား ဈေးကောင်းရနေသလို ဖြစ်တာ” လို့ ပြောပါတယ်။
လက်ဖက်ကို အဓိက စိုက်ပျိုးထုတ်လုပ်တဲ့ နမ့်ဆန်၊ မန်တုံနဲ့ ကျောက်မဲ စတဲ့မြို့နယ်မှာလည်း လက်ဖက် ဈေးကောင်းရဖို့နဲ့ လက်ဖက်အရည်အသွေး ထိန်းသိမ်းဖို့ ရွက်ကြမ်းနဲ့ လက်ဖက်အတု မခူးကြဖို့ကိုလည်း တောင်သူတွေကြား သတိပေး ပြောဆိုနေကြပါတယ်။
ပြီးခဲ့တဲ့နှစ် ရွှေဖီလက်ဖက် ရွက်စိမ်းတစ်ပိဿာကို ၃,၅၀၀ နဲ့ ၃,၇၀၀ ကြား အမြင့်ဆုံးဈေး ရခဲ့တယ်လို့ လက်ဖက်တောင်သူတွေရဲ့ ပြောပြချက်အရ သိရပါတယ်။
