လွေးထွေး၊ မတ်လ ၂၅ ရက်၊ သီပေါ
တအာင်းတပ်မတော် ထိန်းချုပ်ထားတဲ့ သီပေါမြို့နယ်ရှိ နားခေါ်ကျေးရွာအုပ်စု ကျင်သီရွာအနီးက တိန်လုံ ကြိုးဝိုင်းထဲမှ သစ်တွေကို ရှမ်းတပ်မတော်- SSPP/SSA က ခုတ်ယူနေတယ်လို့ ဖြစ်စဉ်သိရှိသူ အမျိုးသားတစ်ဦးရဲ့ ပြောပြချက်အရ သိရပါတယ်။
မတ်လ တတိယအပတ်ကတည်းက သစ်တောကြိုးဝိုင်းထဲက သစ်ပင် အသေးစားတွေကိုပါ SSPP က ခုတ်ယူနေပြီး ရောင်းချဖို့ လုပ်နေတာ ဖြစ်ပါတယ်။
ဖြစ်စဉ်သိရှိသူ အမျိုးသားက “သူတို့ခုတ်တဲ့ သစ်တွေက အရွယ်ငယ်သေးတယ်။ ကြိုးဝိုင်းထဲက သစ်လည်းဖြစ်တယ်။ ကားလမ်း အရှေ့ဘက်ခြမ်း TNLA ဝင်လို့မရတဲ့တစ်ကျောလုံး ဖြစ်တယ်။ TNLA တွေ ဝင်ကြည့်ဖို့ လုပ်တော့လည်း သူတို့ မပေးဘူး” လို့ ပြောပါတယ်။
ဒါ့အပြင် SSPP ဟာ သီပေါမြို့နယ်က ကျေးရွာတချို့မှာလည်း ဆန်၊ ဆီ၊ ဆားအပြင် ငွေတောင်းနေတဲ့ လုပ်ရပ်လည်း လုပ်ဆောင်နေတာရှိကြောင်း အထက်ပါ အမျိုးသားက ဆက်ပြောပါတယ်။
ဖြစ်စဉ်နဲ့ပတ်သက်ပြီး အသေးစိတ် သိရဖို့ SSPP ရဲ့ ပြောရေးဆိုခွင့်ရှိသူတွေကို ဖုန်းနဲ့ ဆက်သွယ်ပေမဲ့ မရခဲ့ပါဘူး။
TNLA ထိန်းချုပ်နယ်မြေဖြစ်တဲ့ ကျောက်မဲမြို့နယ်မှာလည်း ပြီးခဲ့တဲ့ ဇန်နဝါရီ တတိယအပတ်က သတ်မှတ်ထားတဲ့ ကြိုးဝိုင်းထဲက ကျွန်းပင် ခိုးခုတ်သူ အရပ်သား ၁၇ ဦးကို TNLA က ဖမ်းဆီးခဲ့ပြီး ၁ လအကြာမှာ ပြန်လွှတ်ပေးခဲ့ဖူးပါတယ်။
