ပျားကြီး၊ မတ်လ ၂၄ ရက်၊ မန္တလေး
မန္တလေးမြို့ပေါ်ရှိ ရပ်ကွက်အများစုမှာ ဒီနေ့မနက်ပိုင်းကစပြီး စစ်မှုထမ်းသင်တန်း အပတ်စဉ် ၁၂ တက်ရောက်ဖို့အတွက် အတင်းအကြပ် မဲနှိုက်ခိုင်းတာတွေ ပြုလုပ်ခဲ့ကြတယ်လို့ ဒေသခံတွေက ပြောပါတယ်။
အောင်မြေသာစံ၊ ချမ်းအေးသာဇံ၊ မဟာအောင်မြေ၊ ပြည်ကြီးတံခွန်၊ ပုသိမ်ကြီး စတဲ့မြို့နယ်တွေက ရပ်ကွက်အများစုမှာ စစ်မှုထမ်းဖို့အတွက် မဲနှိုက်ရွေးချယ်ခဲ့ကြတာ ဖြစ်ပါတယ်။
“ကျနော့်သား မဲ ပေါက်တယ်လို့ပြောတယ်။ ဒီတစ်ယောက်တည်းပဲ ရှိတယ်။ ဒီကလေးကပဲ ရှာကျွေးနေတယ်။ အခု ဒီကလေးကို ခေါ်မယ်ဆိုရင် ကျုပ်တို့ အိုကြီးအိုမ အဘိုးကြီး အဘွားကြီးတွေ သေရုံ ရှိတော့တာပဲ” လို့ အသက် ၇၀ အရွယ် ဒေသခံအဘိုးတစ်ဦးက ပြောပါတယ်။
စစ်မှုထမ်း မဲနှိုက်ရွေးချယ်မှုကို ဒီနေ့မနက် ၉ နာရီဝန်းကျင်က တစ်ချိန်တည်း ပြုလုပ်ခဲ့ကြတာဖြစ်ပြီး စစ်တပ်နဲ့ ပျူစောထီး၊ ရဲက လုံခြုံရေး ယူပေးခဲ့ကြတယ်လို့ မျက်မြင်တွေ့သူတွေက ပြောဆိုပါတယ်။
မဲပေါက်သူတွေကိုလည်း ထွက်ပြေးတိမ်းရှောင်တာ မလုပ်ဖို့ ပြင်းပြင်းထန်ထန် သတိပေးထားပြီး မိသားစုဝင်တွေကိုပါ ခြိမ်းခြောက်ခဲ့တယ်လို့ ကာယကံရှင်တွေက ပြောပါတယ်။
စစ်အင်အား လိုအပ်ချက် မြင့်မားနေတဲ့ စစ်ကောင်စီဟာ မန္တလေးမြို့နဲ့ အနီးဝန်းကျင်က ကျေးရွာတွေမှာရှိတဲ့ အသက်ပြည့်မီသူကို ရပ်ကွက်တစ်ခုမှာ အနည်းဆုံး ၅ ဦးကနေ ၁၀ ဦးနဲ့ ကျေးရွာအုပ်စုတစ်ခုကို အနည်းဆုံး လူ ၂၀ ကနေ ၅၀ ကြားအထိ ပေးပို့ဖို့ ပြီးခဲ့တဲ့ ရက်သတ္တပတ်အတွင်းကပဲ ရပ်ကျေးအုပ်ချုပ်ရေးမှူးတွေကို ညွှန်ကြားထားတယ်လို့ အမည်မဖော်လိုတဲ့ ရဲတစ်ဦးက အတည်ပြု ပြောဆိုပါတယ်။
