ပို့လဘား၊ မတ်လ ၂၄ ရက်၊ နမ့်ခမ်း
ရှမ်းမြောက် နမ့်ခမ်းမြို့နယ်ထဲက ကျေးရွာတချို့မှာ မိုးနဲ့အတူ မိုးသီး ရွာချတာကြောင့် နေအိမ် ရာနဲ့ချီ ပျက်စီးခဲ့တယ်လို့ ဒေသခံတွေက ပြောပါတယ်။
မတ်လ ၂၂ ရက် နေ့လယ် ၃ နာရီခွဲမှာ မိုးသီး ရွာချပြီး အိမ်ခြေ ၇ဝ ရှိတဲ့ တွန်ပုတ်ရွာ တစ်ရွာလုံးနီးပါးရှိ နေအိမ်ရဲ့ ခေါင်မိုးတွေ ပျက်စီးသွားတယ်လို့ ဒေသခံတစ်ဦးက ပြောပါတယ်။
“ဟိုနေ့က မိုးသီး ရွာတာ တောင်ပေါ်ကအိမ် အကုန်ပေါက်တယ်။ မနေ့က သွပ်တွေ အကုန်လဲရတယ်။ တွန်ပုတ်ရွာ တစ်ရွာလုံး ထိတယ်တဲ့။ အိမ်ဟောင်း သွပ်ဟောင်းတွေ ပေါက်တာ။ ဝယ်နိုင်တဲ့အိမ်တော့ ဝယ်ပြီး ကျန်တဲ့အိမ်တော့ ဒီအတိုင်းပဲ”
အလားတူ မိုးသီး ရွာချမှုကြောင့် မန်ကောင်းရွာက အိမ်ခြေ ၃ဝ ကျော်နဲ့ အိမ်ခြေ ၁၆ဝ ကျော်ရှိတဲ့ စယ်လုံရွာကတော့ ၂ဝ ကျော် ထိခိုက်ပျက်စီးခဲ့တယ်လို့ ဆိုပါတယ်။
မနေ့ မတ်လ ၂၃ ရက်ကလည်း ကွတ်ခိုင်မြို့ ရပ်ကွက် ၂ မှာ လေပြင်း တိုက်ခိုက်ရာကနေ သစ်ပင် လဲကျမှုကြောင့် နေအိမ် ၂ လုံး ထိခိုက်ပျက်စီးခဲ့ပါတယ်။
