လွေးလာဝ်ဇာရ်၊ မတ်လ ၂၃ ရက်၊ ကွတ်ခိုင်
TNLA ထိန်းချုပ်ထားတဲ့ ရှမ်းမြောက် ကွတ်ခိုင်မြို့ ရပ်ကွက် (၂) မှာ လေပြင်းတိုက်ခတ်ရာကနေ သစ်ပင်လဲကျမှုကြောင့် နေအိမ် ၂ လုံး ထိခိုက်ပျက်စီးခဲ့တယ်လို့ သိရပါတယ်။
ဒီနေ့ မတ်လ ၂၃ ရက် နေလယ် ၂ နာရီကျော်မှာ လေပြင်းတိုက်ခတ်တာကြောင့် ဆောက်လက်စ နေအိမ်တစ်လုံးနဲ့ ဘေးကပ်အိမ်တစ်လုံး ထိခိုက်ပျက်စီးခဲ့ပေမယ့် လူထိခိုက်တာတော့ မရှိဘူးလို့ ဆိုပါတယ်။
ကွတ်ခိုင် ဒေသခံတစ်ဦးက “မိုးတော့ သိပ်မရွာပေမယ့် မိုးသီးကျတယ်။ လေတိုက်တာတော့ တအားဘဲ။ ယူကလစ်ပင် အကြီးကြီးတွေ အိမ်ပေါ် လဲကျတာ။ သူတို့လည်း အိမ်ထဲမှာဘဲနေတာ။ သူတို့ကို ထိခိုက်တာတော့ မရှိဘူး” လို့ ပြောပါတယ်။
လွန်ခဲ့တဲ့ ၂၀၂၃ ခုနှစ် ဇူလိုင် ၁၉ ရက်မှာလည်း ကွတ်ခိုင်မြို့နယ် ကောင်းလိမ်ကျေးရွာအုပ်စု ကျောင်းပျဉ်ရွာမှာ လေပြင်းတိုက်ခတ်လို့ စာသင်ကျောင်းအပါအဝင် ဘုန်းကြီးကျောင်းနဲ့ နေအိမ် ၁၁ လုံး ထိခိုက်ပျက်စီးခဲ့ပါတယ်။
