ပို့လဘား၊ မတ်လ ၂၂ ရက်၊ ၁၀၅ မိုင်
ညီနောင်မဟာမိတ် ၃ ဖွဲ့ ပူးပေါင်းထိန်းချုပ်ထားတဲ့ ရှမ်းမြောက် မူဆယ် ၁၀၅ မိုင်မှာ အမျိုးသား ၂ ဦးက အမျိုးသမီးတစ်ဦးကို ဓားနဲ့ခုတ်လို့ ဒဏ်ရာ ရရှိခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ပြောပါတယ်။
မတ်လ ၂၀ ရက် ည ၉ နာရီက အမျိုးသားနှစ်ဦးက အသက် ၂၇ နှစ်အရွယ် မအီမွန်ဆိုတဲ့ အမျိုးသမီးကို ဓားနဲ့ ခုတ်ခဲ့တာလို့ ပြောပါတယ်။
“နှစ်ယောက် လာတာပေါ့ မတ်စ်လည်း တပ်ထားတယ်။ တစ်ယောက်က လမ်းဘေးမှာ ဆိုင်ကယ်ပေါ် စောင့်နေတာ။ အဲဒီအမျိုးသမီးက အိမ်သာ သွားမယ်ဆိုပြီး တံခါးဖွင့်တဲ့အချိန်မှာ သူအဲဒီအမျိုးသမီးရဲ့ ဆံပင်ကို ဆွဲပြီး လည်ပင်းကို ညစ်လိုက်တယ်။ လည်ပင်းမှာ ဓားရှတဲ့ဒဏ်ရာ ရတယ်။ သူ့ရဲ့ ဘယ်ဘက်လက်မောင်းမှာလည်း ဓားနဲ့ထိုးတဲ့ဒဏ်ရာ ရတယ်”
ဆက်လက်ပြီး ၎င်းက “အမျိုးသမီးက ဘေးအိမ်တွေ ခေါ်နေတဲ့အချိန် အကူအညီ တောင်းတဲ့အချိန်မှပဲ သူထွက်ပြေးသွားတယ်။ အုတ်တံတိုင်းပေါ်ကျော်တက်ပြီး ထွက်ပြေးသွားတယ်။ ရှေ့ရက်က သူအဲဒီအမျိုးသမီးဆီ လာသေးတယ်။ အာကာ သက်သာပီလားဆိုပြီး လာမေးသေးတယ်တဲ့။ အမျိုးသမီးက ဘယ်သူလဲမေးတော့ အာကာရဲ့သူငယ်ချင်းဆိုပြီး ပြောသွားတယ်” လို့ ပြောပါတယ်။
ဓားထိုးသွားတဲ့ အမျိုးသားနှစ်ဦးထဲမှ တစ်ဦးက ပကဖရဲ့ အဖွဲ့ဝင်ဟောင်းဖြစ်ပြီး တစ်ဦးကတော့ ပြည်သူ့စစ် ဖြစ်တယ်လို့ သူက ပြောပါတယ်။
အဲဒီအမျိုးသားနှစ်ဦးဟာ ပြီးခဲ့တဲ့ မတ်လ ၁၅ ရက်က ၁၀၅ မိုင်မှာရှိတဲ့ လျှပ်စစ်ရုံးအတွင်း တအာင်းတပ်ရဲ့ လမ်းညွှန်မှုနဲ့ လှုပ်ရှားနေတဲ့ Local PDF တစ်ဦးကို ဓားထိုးခဲ့သူနှစ်ဦး ဖြစ်တယ်လို့ ပြောပါတယ်။
ထွက်ပြေးသွားတဲ့ ပကဖ အဖွဲ့ဝင်ဟောင်းနဲ့ ပြည်သူ့စစ် နှစ်ဦးကိုတော့ TNLA ရဲ့ တရားဥပဒေစိုးမိုးရေးတပ်ဖွဲ့နဲ့ သက်ဆိုင်ရာ တာဝန်ရှိသူက ပြီးခဲ့တဲ့ မတ်လ ၁၅ ရက်ကတည်းက လိုက်လံ ရှာဖွေနေပေမဲ့ လက်ရှိအချိန်ထိ ဖမ်းမိတာ မရှိသေးဘူးလို့ သိရပါတယ်။
