ယာရူစိင်၊ မတ်လ ၂၂ ရက်
တအာင်းပညာရေးအင်စတီကျူ့ TEI မှ ၂၀၂၅ – ၂၀၂၆ ပညာသင်နှစ်အတွက် ဆရာ၊ ဆရာမ ၆၅ ဦး ခေါ်ယူနေတယ်လို့ သိရပါတယ်။
စာသင်ကျောင်းတွေ လိုအပ်တဲ့ ကျေးရွာ (၁၂၀) မှာ ကျောင်းပေါင်း (၁၂၀) ဖွင့်လှစ်သွားမှာဖြစ်ပြီး အဲကျောင်းတွေမှာ တာဝန်ထမ်းဆောင်ရန်အတွက် ဆရာ၊ ဆရာမ ၆၅ ဦး လိုအပ်နေတယ်လို့ TEI မှ တာဝန်ရှိသူတစ်ဦးက ရွှေဖီမြေကို ပြောပါတယ်။
စာသင်ကျောင်း ထပ်မံဖွင့်လှစ်မယ့်နေရာဟာ တအာင်းဒေသဖြစ်တာကြောင့် အဲဒေသက ကလေးငယ်တွေအတွက် ဘာသာစကား အဆင်ပြေစေရေးအတွက် တအာင်းလူမျိုးဖြစ်တဲ့ ဆရာ၊ ဆရာမတွေကို ဦးစားပေး ခေါ်ယူမှာဖြစ်တယ်လို့ ပြောပါတယ်။
“ကျောင်းပေါင်း ၁၂၀ ဖွင့်မယ်ဆိုတာက အရင်နှစ်တွေမှာ ၁၂၃ ကျောင်းရှိပေမယ့် TLEC ထံ ၁၄ ကျောင်း လွှဲပေးထားတာမျိုးရှိတယ်။ ၁၀၉ ကျောင်း ကျန်တယ်ပေါ့နော်။ ဒါကြောင့် ဒီနှစ်မှာ နောက်ထပ် ၁၁ ကျောင်း ထပ်ဖွင့်လိုက်တယ်။ ကျောင်းပေါင်း ၁၂၀ ဖြစ်သွားတယ်ပေါ့နော်။ မိုင်းယော်၊ တန့်ယန်းနဲ့ မုံးစီး ဒေသရှိ ကျေးရွာတွေမှာဘဲ ဖွင့်တာမဟုတ်ဘဲ တခြားဒေသတွေမှာလဲ ဖွင့်ပါတယ်။ သို့သော် အဓိက စာသင်ကျောင်း လိုအပ်တဲ့ ဒေသတွေဖြစ်တဲ့အတွက် လျှောက်လွှာခေါ်ယူရခြင်း ဖြစ်တယ်”
ပြီးခဲ့တဲ့ ၂၀၂၄-၂၀၂၅ ပညာသင်နှစ်မှာ ဆရာ၊ ဆရာမ ၂၄၄ ဦးရှိပြီး လက်ရှိ ကျောင်း ၁၁ ကျောင်း ထပ်ဖွင့်တာကြောင့် နောက်ထပ် ဆရာ၊ ဆရာမ ၆၅ ဦး ခေါ်ယူရခြင်းဖြစ်တယ်လို့ ပြောပါတယ်။
တအာင်းပညာရေးအင်စတီကျူ့ TEI ဟာပြီးခဲ့တဲ့ ၂၀၁၇ ခုနှစ်ကတည်းက စတင်တည်ထောင်ခဲ့တဲ့ အဖွဲ့တစ်ခု ဖြစ်ပါတယ်။
