ခိုင်လေး၊ မတ်လ ၂၁ ရက်၊ ပန်ဆန်း
“ဝ” ဒေသမှာ ငွေလိမ်လုပ်ငန်း လုပ်ကိုင်တဲ့ တရုတ်နိုင်ငံသား (၁၈) ဦးနဲ့ ကျားဖြန့်ရုံးက အသုံးပြုတဲ့ စက်ပစ္စည်းကိရိယာတွေကို “ဝ” ပြည်သွေးစည်း ညီညွတ်ရေးတပ်မတော် UWSA က တရုတ်နိုင်ငံသို့ လွှဲပြောင်းပေးခဲ့တယ်လို့ သိရပါတယ်။
ကျားဖြန့်လုပ်ကိုင်တဲ့ တရုတ်နိုင်ငံသား (၁၈) ဦးကို “ဝ” ရဲ့ ရဲတပ်ဖွဲ့က ပန်ဆန်းမြို့ မုန်းလျန်း၊ မုန်းအား တံတားကနေတဆင့် တရုတ်နိုင်ငံသို့ လွှဲပြောင်းပေးအပ်ခဲ့တာ ဖြစ်ပါတယ်။
“လွှဲပြောင်း ပေးခဲ့တာတော့ မှန်တယ်။ အသေးစိတ် အချက်အလက်ကိုတော့ မသိရပါဘူး” လို့ UWSA ရဲ့ ပြည်ပဆက်ဆံရေးရုံးတာဝန်ခံ ဦးညီရန်းက ရွှေဖီမြေကို ပြောပါတယ်။
တရုတ်နိုင်ငံဘက်သို့ လွဲပြောင်းပေးလိုက်တဲ့ ကျားဖြန့်လုပ်သားတွေကို “ဝ” ဒေသအတွင်းမှာ ဖမ်းဆီးရမိခဲ့တာဖြစ်ပြီး အဲဒီအထဲမှာ ကျားဖြန့်ခေါင်းဆောင်တချို့လည်း ပါဝင်တယ်လို့ အခြေအနေသိရှိသူ အမျိုးသမီးတစ်ဦးက ရွှေဖီမြေကို ပြောပါတယ်။
“လွဲပြောင်းပေးလိုက်တာတော့ ဟုတ်တယ်။ Wa State TV မှာတော့ ၁၃ ရက်နေ့မှာ သတင်း ထုတ်လွင့်ထားတာ တွေ့တယ်။ အဲထဲမှာ ဘယ်မှာဖမ်းမိတာလဲဆိုတာတော့ အသေးစိတ် မဖော်ပြထားဘူး။ ဟိုပန်မှာ ဖမ်းမိတာတော့ သိထားတယ်။ နောက်ထပ် ဘယ်ဒေသတွေမှာ ပြန်ဖမ်းမိတာတော့ မသိဘူး”
ပြီးခဲ့တဲ့ ဖေဖော်ဝါရီ ၂၀ ရက်က ဟိုပန်မြို့ မိန်းပန်း(ရှမ်း)ရပ်ကွက်ထဲက ကျားဖြန့်လုပ်ငန်းတစ်ခုကို UWSA တပ်ဖွဲ့က ဝင်ရောက်စီးနင်းခဲ့ရာ ကျားဖြန့်လုပ်ကိုင်သူ ၁၀၅ ဦးနဲ့ ကျားဖြန့်ရုံးအတွင်း အသုံးပြုတဲ့ ပစ္စည်းတွေကိုလည်း သိမ်းဆည်းရမိခဲ့ပါတယ်။
ပြီးခဲ့တဲ့ ၂၀၂၄ ခုနှစ် နိုဝင်ဘာလထဲမှာလည်း ရှမ်းမြောက် တန့်ယန်းမြို့နယ်ရှိ ကျားဖြန့်လုပ်ကိုင်သူ ၁ ထောင်ကျော်ကို UWSA က ဖမ်းဆီးရမိခဲ့ပြီး တရုတ်နိုင်ငံသား ၇၆၂ ဦးကို တရုတ်ထံ လွှဲပြောင်းပေးခဲ့ပါတယ်။
