ခိုင်လေး၊ မတ်လ ၂၁ ရက်၊ မင်းလှ
ပဲခူးတိုင်း၊ သာယာဝတီခရိုင်၊ မင်းလှမြို့နယ်၊ စစ်ကွင်းမြို့၊ အုတ်တွင်းရွာအနီး ရန်ကုန်-ပြည် ကားလမ်းဘေးမှာ အထိုင်ချ တပ်ဆွဲထားတဲ့ စစ်ကောင်စီဂိတ်ကို သာယာဝတီခရိုင် တပ်ရင်း (၃၈၀၂)၊ တပ်ခွဲ (၂) က ရဲဘော်တွေ လာရောက်တိုက်ခိုက်ခဲ့တာကြောင့် စစ်သား ၈ ဦး သေဆုံးပြီး ၁၀ ဦး ဒဏ်ရာရခဲ့ပါတယ်။
ဒေသခံတွေကို ဖမ်းဆီးငွေညှစ်နေတဲ့ စစ်ကွင်းတာဆုံ စစ်ဆေးရေးဂိတ်ကို သာယာဝတီခရိုင် PDF ရဲဘော်တွေက မနေ့ မတ်လ ၂၀ ရက် မနက် ၁ နာရီခွဲမှာ ဝင်ရောက်တိုက်ခိုက်ခဲ့ရာ ၂ နာရီဝန်းကျင် ကြာမြင့်တဲ့ နှစ်ဖက်အပြန်အလှန် ပစ်ခတ်မှုဖြစ်ပွားခဲ့တယ်လို့ သာယာဝတီခရိုင်တပ်ရင်း (၃၈၀၂)၊ တပ်ခွဲ (၂) က တပ်ခွဲမူး ဗိုလ်တိမ်တိုက်က ရွှေဖီမြေကို ပြောပါတယ်။
“အဲမှာ စစ်တပ်က အင်အား ၂၀ ကျော် ၃၀ ဝန်းကျင် ရှိပါတယ်။ တိုက်ပွဲတွင်းမှာ ၇ ယောက်။ ဒီနေ့က အဝေးထိန်းမှိုင်းနဲ့က တစ်ယောက်သေပါတယ်။ ကျနော်တို့ဘက် ရဲဘော်တစ်ယောက် လက်မောင်းကျည်ရှပ်ထိ မစိုးရိမ်ရ ဒဏ်ရာရရှိ ခဲ့ပါတယ်”
တိုက်ခိုက်မှုအတွင်း စစ်ကောင်စီတပ်ဘက်မှ အလောင်းကောက် ဆုတ်ခွာထွက်ပြေးသွားကြချိန် PDF ရဲဘော်တွေက ကာဘိုင်သေနတ် (၁) လက်၊ ကျည်ဘောက် (၁) ခု၊ ကျည် (၂၀) တောင့်၊ စစ်အသုံးအဆောင်တချို့နဲ့ ဆိုင်ကယ် (၁) စီး သိမ်းဆည်းရရှိခဲ့ပြီး စခန်းကိုလည်း မီးရှို့ထားခဲ့ပေမဲ့ မီးအနည်းငယ်သာ လောင်ကျွမ်းခဲ့တယ်လို့ ဆိုပါတယ်။
မီးအနည်းငယ်သာ လောင်ကျွမ်းသွားတဲ့ စစ်ကွင်းတာဆုံ စစ်ဆေးရေးဂိတ်ရဲ့ ဘန်ကာမှာ ပြန်လည် လုံခြုံရေးယူနေတဲ့ စစ်ကောင်စီတပ်ကို သာယာဝတီခရိုင် PDF ရဲဘော်တွေက ဒီနေ့ မနက် ၁၀ နာရီမှာ အဝေးထိန်းဗုံးနဲ့ ထပ်မံဖောက်ခွဲတိုက်ခိုက်ခဲ့တာကြောင့် ၁ ဦး သေဆုံးပြီး ၄ ဦး ထပ်မံ ဒဏ်ရာရရှိခဲ့တယ်လို့ ဆိုပါတယ်။
ဆက်လက်ပြီး ဒေသခံတွေနဲ့ တော်လှန်ရေးတပ်ဖွဲ့တွေကို ဒုက္ခပေးနေတဲ့ စစ်ကောင်စီနဲ့ ၎င်းရဲ့ထောက် တိုင်တွေကို အရှိန်မြင့် တိုက်ခိုက်သွားမှာ ဖြစ်တာကြောင့် ဒေသခံတွေအနေနဲ့ စစ်တပ်တို့အနီး သွားလာနေထိုင်တာတွေ လုံးဝမပြုလုပ်ကြဖို့ သာယာဝတီခရိုင် PDF တွေ အသိပေးထားတာရှိပါတယ်။
