ရွှေဖီမြေ၊ မတ်လ ၂၁ ရက်၊ နမ့်ဆန်
ကိုးကန့်ဒေသ လောက်ကိုင်ဘက် အလုပ် သွားလုပ်တဲ့ တအာင်းဒေသ နမ့်ဆန်မြို့နယ် ဇယ်တုန်ဟုန်းရွာက အသက် ၃၀ ကျော်အရွယ် မဝင်းကြည်ဆိုသူ အမျိုးသမီးဟာ ၁ နှစ်ကျော် ကြာတဲ့အထိ အဆက်အသွယ် ပြတ်တောက်နေပါတယ်။
ကိုးကန့်တပ်မတော်က လောက်ကိုင် မြို့သိမ်းတိုက်ပွဲ ဆင်နွှဲတုန်းက လောက်ကိုင်ကနေ ဝဒေသဘက် တိမ်းရှောင်သွားခဲ့ပြီးနောက် အဆက်အသွယ် ပြတ်တောက်သွားတာလို့ ဖြစ်စဉ်သိရှိသူ အမျိုးသမီးတစ်ဦးက ရွှေဖီမြေသို့ ပြောပါတယ်။
“ဝဘက် ရောက်သွားတော့ သူ့အမေဆီ သူအသံဖိုင်တစ်ခု ပို့လာတယ်။ သူဝပြည်ဘက် ရောက်သွားတယ်ပေါ့။ အဲနောက်ပိုင်း မဆက်သွယ်လာဘူး။ သူ့မိဘက ပြန်ဆက်သွယ်တော့လည်း မရဘူး”
ဝပြည်ဘက် ရောက်ရှိသွားတယ်လို့သာ ပြောဆိုခဲ့ပြီး ဘယ်မြို့ကို ရောက်နေလဲဆိုတာတော့ မပြောဆိုခဲ့ဘူးလို့ ဆိုပါတယ်။
ပျောက်ဆုံးနေသူ မဝင်းကြည်ဟာ ကလေး ၂ ဦး မိခင်ဖြစ်ပြီး ယောကျာ်းဖြစ်သူကလည်း ၂၀၂၄ ခုနှစ်မှာ ကွယ်လွန်သွားတာကြောင့် ကလေးနှစ်ဦးကတော့ ဇယ်တုန်ဟုန်းရွာက သူမရဲ့ မိခင်ဖြစ်သူနဲ့ ကျန်ရစ်ခဲ့တယ်လို့ ၎င်းအမျိုးသမီးက ဆက်ပြောပါတယ်။
သူမရဲ့ မိခင်ကလည်း နှလုံးရောဂါ ရှိနေသူဖြစ်ပြီး လက်ရှိမှာ ကလေး ၂ ယောက်ကို တာဝန်ယူ စောင့်ရှောက်နေရတာကြောင့် မဝင်းကြည်ကို တွေ့ရှိသူတွေအနေနဲ့ ဆက်သွယ်ပေးကြဖို့ အကူအညီ တောင်းခံထားပါတယ်။
၂ဝ၂၃ နှစ်ကုန်ပိုင်းမှာ ကိုးကန့်တပ်က လောက်ကိုင်မြို့သိမ်းတိုက်ပွဲ ဆင်နွှဲခဲ့ရာ လောက်ကိုင်ကနေ နေရပ်သို့ ပြန်လာကြတဲ့ လူငယ် ထောင်ချီကို အတင်းအဓမ္မ တပ်သားသစ် စုဆောင်းခဲ့သလို ဒေသခံလူထု ရာချီကလည်း ပျောက်ဆုံးခဲ့ပြီး အဆက်အသွယ် မရကြောင်း မိသားစုဝင်တွေက ရွှေဖီမြေသို့ ပြောဆိုထားဖူးပါတယ်။
