ပျားကြီး၊ မတ် ၂၁ ရက်၊ မန္တလေး
မန္တလေးမြို့ပေါ်မှာ ထောက်ပံ့ကြေးပေးမယ်ဆိုတဲ့ မက်လုံးနဲ့ အနယ်နယ်အရပ်ရပ်က ရောက်ရှိနေတဲ့ စစ်ဘေးရှောင် လူဦးရေစာရင်းကို စစ်ကောင်စီက ကောက်ယူနေတယ်လို့ ဒေသခံတွေက ပြောပါတယ်။
ပြီးခဲ့တဲ့ ရက်ပိုင်းအတွင်းကစပြီး မန္တလေးမြို့ပေါ်က ဘုန်းတော်ကြီးကျောင်းတွေနဲ့ ရပ်ကွက်တွေထဲမှာ နေထိုင်နေတဲ့ စစ်ဘေးရှောင်တွေရဲ့စာရင်းကို စစ်ကောင်စီလက်ဝေခံ သံဃာ့နာယကအဖွဲ့တွေနဲ့ ရပ်ကျေးအုပ်ချုပ်ရေးမှူးတွေက ကောက်ယူပြီး စစ်ကောင်စီကို ပေးပို့နေရတာဖြစ်ပါတယ်။
“ဘုန်းကြီးကျောင်းတွေမှာရှိတဲ့ လူဦးရေစာရင်း ပို့ပေးရတယ်။ ရပ်ကွက်တွေထဲမှာလည်း လိုက်ကောက်နေတယ်။ ထောက်ပံ့ကြေးပေးဖို့ဆိုပြီး ကောက်တော့ စာရင်းပေးကြတဲ့သူတွေလည်း တော်တော်များတယ်။ အဓိကကောက်တာက အသက်ပေါ့။ အသက်ကို ဖောင်ထဲမှာ မထည့်မနေရ ထည့်ပေးရတယ်” လို့ အောင်မြေသာစံမြို့နယ်က အသက် ၅၀ အရွယ် ဒေသခံတစ်ဦးက ပြောပါတယ်။
ကချင်ပြည်နယ်၊ ရှမ်းပြည်နယ်(မြောက်ပိုင်း)၊ စစ်ကိုင်းတိုင်း၊ မကွေးတိုင်းနဲ့ မန္တလေးတိုင်းထဲက စစ်ကောင်စီရဲ့လက်ချက်နဲ့ ထွက်ပြေးတိမ်းရှောင်နေရသူတွေဟာ မန္တလေးမြို့ပေါ်မှာ သိန်းနဲ့ချီပြီး ရှိနေတယ်လို့ မန္တလေးမြို့အခြေစိုက် စစ်ရှောင်ကူညီပေးနေသူတစ်ဦးက ဆိုပါတယ်။
လက်ရှိအချိန်မှာ စာရင်းကောက်ယူမှုကို မတ်လ ၃၁ ရက် နောက်ဆုံးထားပြီး ကောက်ယူဖို့ စစ်ကောင်စီက ညွှန်ကြားထားပြီး စာရင်းထိန်ချန်တာတွေ မလုပ်ဖို့ ပြင်းပြင်းထန်ထန်သတိပေးထားတယ်လို့ လုံခြုံရေးအရ ဘွဲ့အမည်ကို ထုတ်ဖော်ပြောဆိုဖို့ ငြင်းဆန်ထားတဲ့ စာချဆရာတော်တစ်ပါးက မိန့်ပါတယ်။
စာရင်းကောက်ယူရာမှာ အမည်၊ အဖအမည်၊ နေရပ်လိပ်စာ၊ မှတ်ပုံတင်အမှတ်၊ ကျား/မ၊ မွေးသက္ကရာဇ်၊ အသက်၊ လက်ရှိနေရပ်လိပ်စာ စတဲ့အချက်တွေကို ကောက်ယူနေတာဖြစ်ပြီး ဘုန်းတော်ကြီးကျောင်းတွေကတော့ အားလုံးနီးပါး စာရင်းပေးပို့ထားပြီးဖြစ်တယ်လို့ ဆရာတော်က ဆက်မိန့်ပါတယ်။
