အိုက်ပွီး၊ မတ်လ ၂၁ ရက်၊ ကျောက်တော်
အာရက္ခတပ်တော် AA ထိန်းချုပ်ထားတဲ့ ရခိုင်ပြည်နယ်၊ ကျောက်တော်မြို့နယ်၊ မင်းသားတောင်ကျေးရွာမှာ စစ်ကျန် ဗုံးသီးပေါက်ကွဲလို့ ကလေးတစ်ဦး သေဆုံးပြီး လေးဦး ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။
မတ်လ ၁၉ ရက် ညနေ ၃ နာရီ ၄၅ မိနစ်အချိန်မှာ မင်းသားတောင်ကျေးရွာ၊ သရီချောင်းထဲက ကောက်ယူရရှိတဲ့ စစ်ကျန် ဗုံးသီးတစ်လုံးကို ဆော့ကစားရာမှ မတော်တဆ ပေါက်ကွဲမူဖြစ်ပွားပြီး ထိခိုက်သေဆုံးခဲ့ကြတာ ဖြစ်ပါတယ်။
“ကလေးတွေဆိုပေမဲ့ ၁၀ နှစ်ကျော်တွေ ချည်းပဲလေ။ ချောင်းထဲက ကောက်ရတယ်ဆိုတော့ မပေါက်ကွဲတော့ဘူးအထင်နဲ့ ဆော့ကစားတာလည်း ဖြစ်နိုင်တယ်။ ဗုံးကောက်ရတဲ့ကလေးက ပွဲချင်းပြီး ဆုံးသွားတယ်။ ကျန်လေးဦး ဒဏ်ရာရတယ်။” လို့ ကျောက်တော်မြို့နယ် ဒေသခံအမျိုးသားတစ်ဦးက ရွှေဖီမြေသို့ ပြောပါတယ်။
သေဆုံးသူဟာ အသက် ၁၆ နှစ်အရွယ် မောင်မောင်ဌေးဦးဖြစ်ပြီး ဒဏ်ရာရရှိသူတွေကတော့ အသက် (၁၆) နှစ်အရွယ် မောင်ကျော်ဆန်းလင်း၊ အသက် (၁၅) နှစ်အရွယ် မောင်ခိုင်အောင်မျိုး၊ အသက် (၁၄) နှစ်အရွယ် မောင်နေပိုင်စိုးနဲ့ အသက် (၁၃) နှစ်အရွယ် မောင်မောင်သန်းနိုင်တို့ ဖြစ်ပါတယ်။
ထိခိုက်ဒဏ်ရာရရှိတဲ့ ကလေး ၄ ဦးကလည်း ပြင်းထန်ဒဏ်ရာရရှိပြီး အသက်အန္တရယ် စိုးရိမ်နေရတာကြောင့် အရေးပေါ် ဆေးကုသမူ ခံယူနေကြရတယ်လို့ သိရပါတယ်။
ဒါ့အပြင် မတ်လ ၁၉ ရက်နဲ့ ၁၈ ရက်နေ့ကလည်း မင်းပြားမြို့နယ်နဲ့ မောင်တောမြို့နယ်မှာ မြေမြှုပ်မိုင်းနင်းလို့ အမျိုးသမီးတစ်ဦးနဲ့ အမျိုးသားတစ်ဦး ပြင်းထန်ဒဏ်ရာ ရရှိခဲ့ပါတယ်။
လက်ရှိ AA ထိန်းချုပ်နယ်မြေတွေမှာ စစ်ကျန်လက်နက်အန္တရာယ် ပညာပေး ဟောပြောပွဲတွေ၊ မိုင်းအန္တရာယ်ဆိုင်ရာ သတိပေးစာတွေ၊ မိုင်းအန္တရာယ်ဆိုင်ရာ အသိပညာပေး လက်ကမ်းစာစောင် ဖြန့်ဝေပေးတာတွေ၊ မိုင်းရှင်းလင်းရေးလုပ်ငန်းတွေ လုပ်ဆောင်ပေးနေတယ်လို့ သိရပါတယ်။
