အိုက်ပွီး၊ မတ်လ ၁၈ ရက်၊ တမူး
စစ်ကိုင်းတိုင်း၊ တမူးမြို့နယ်၊ မင်းသာကျေးရွာနဲ့ လှည်းဆိပ်ကျေးရွာမှာ တောမီးကူးစက်လို့ လူနေအိမ် ၂၀ လုံးထက်မနည်း မီးလောင်ပျက်စီးသွားတယ်လို့ ဒေသခံတွေဆီက သိရပါတယ်။
မနေ့ မတ်လ ၁၇ ရက် မနက် ၁၀ နာရီခန့်မှာ တောမီးလောင်ရာကနေ မီးကူးပြီး ကျေးရွာမှာ မီးငြိမ်မယ့်သူမရှိတာကြောင့် နေအိမ်တွေ မီးလောင်ခဲ့တာဖြစ်ပါတယ်။
“အဲရွာတွေမှာ လူတွေမရှိတာ ကြာပြီ။ အကုန်နီးပါး စစ်ဘေးရှောင်ကြတယ်။ ရွာထဲမှာ စစ်ကောင်စီတပ်တွေ တပ်စွဲထားတယ်။ မီးငြိမ်းမယ့်သူတွေမရှိလို့ အခုလို နေအိမ်တွေ မီးလောင်ရတာ။ မနေ့ညနေ ၆ နာရီအချိန်ထိ မီးလောင်နေတုန်းပါ” လို့ တမူးမြို့နယ် ဒေသခံအမျိုးသားတစ်ဦးက ရွှေဖီမြေသို့ ပြောပါတယ်။
မနေ့က တောမီးကူးစက်မှုကြောင့် လှည်းဆိပ်ကျေးရွာက ကျောင်းဆရာ၊ ဆရာမ နေအိမ် ၂ လုံးအပါအဝင် လူနေအိမ် ၁၀ လုံးနဲ့ မင်းသာကျေးရွာက လူနေအိမ် ၇ လုံး၊ စုစုပေါင်း ၂၀ လုံးထက်မနည်း မီးလောင်ပျက်စီးသွားတယ်လို့ သိရပါတယ်။
အဲဒီမီးဟာ မနေ့က ညနေ ၆ နာရီအချိန်ထိ ငြိမ်သက်ခြင်းမရှိဘဲ နေအိမ်တွေ လောင်ကျွမ်းနေဆဲဖြစ်တာကြောင့် အခုစာရင်းတွေထက် ပိုများလာနိုင်တယ်လို့ ဆိုပါတယ်။
မင်းသာကျေးရွာအခြေစိုက် စစ်ကောင်စီတပ်က လှည်းဆိပ်ကျေးရွာအနီးတဝိုက်ကို လက်နက်ကြီးကျည်တွေ ပစ်ခတ်ပြီးနောက် အခုလို တောမီးကူးစက်ပြီး နေအိမ်တွေ မီးလောင်ပျက်စီးရတာလို့ သိရပါတယ်။
“မနေ့က မနက်ပိုင်း လှည်းဆိပ်ရွာဘက်မှာ စကစ လက်နက်ကြီးကျည် နှစ်ကြိမ်ထုတယ်။ အဲဒီလက်နက်ကြီးကျည် ထုပြီးနောက် တောမီးတွေ လောင်တယ်။ နွေရာသီဆိုတော့ တောမီးလောင်တွေ လောင်ပြီး ရွာဘက်ထိ ကူးစက်သွားတယ်။ ပိုဆိုးတာက မီးငြိမ်းပေးမယ့်သူ မရှိဘူး” လို့ တမူးမြို့နယ် မင်းသာကျေးရွာမှ စစ်ဘေးရှောင်အမျိုးသားတစ်ဦးက ရွှေဖီမြေသို့ ပြောပါတယ်။
တောမီးကူးစက်ခံရပြီး နေအိမ်မီးလောင်တဲ့ မင်းသာကျေးရွာဟာ စစ်ကောင်စီတပ်ရဲ့ မကြာခဏ မီးရှို့ခံရတဲ့ ကျေးရွာဖြစ်ပြီး ယခုနှစ်ထဲ သုံးကြိမ်ထက်မနည်း မီးရှို့ဖျက်ဆီးခံရပါတယ်။
