လွေးလာဝ်ဇာရ်၊ မတ်လ ၁၇ ရက်၊ နမ့်ခမ်း
ရှမ်းမြောက် နမ့်ခမ်းမြို့နယ် မန်တပ်ကျေးရွာက အမျိုးသားတစ်ဦးဟာ ရွှေလီမြစ်ထဲမှာ လက်လုပ်မိုင်းနဲ့ ငါးဖမ်းဖို့လုပ်နေရာကနေ ပေါက်ကွဲမှုဖြစ်ပြီး သေဆုံးသွားခဲ့တယ်လို့ စုံစမ်းသိရှိရပါတယ်။
မနေ့ မတ်လ ၁၆ ရက် နေ့လယ် ၂ နာရီမှာ ပေါက်ကွဲမှု ဖြစ်ပွါးခဲ့တာဖြစ်ပြီး အဲဒီပေါက်ကွဲမှုကြောင့်ပဲ ဦးမင်းဇော်(၃၀ နှစ်)ဆိုသူရဲ့ညာဘက်လက်တစ်ဖက်ပြတ်သွားတာအပြင် မျက်နှာနဲ့ ရင်ဘတ်မှာလည်း ဒဏ်ရာအပြင်းအထန်ရရှိသွားတယ်လို့ မန်တပ်ရွာခံတစ်ဦးက ဆိုပါတယ်။
မန်တပ်ဒေသခံတစ်ဦးက “သူတို့က ငါးဖမ်းသွားတာ။ သူက မိုင်းနဲ့ ပစ်လိုက်တဲ့အချိန်မှာ မပေါက်တော့ သူလည်း မပေါက်တော့ဘူးထင်လို့ လက်နဲ့ သွားကိုင်တာ။ ကိုင်ပြီး ပစ်ဖို့လုပ်တဲ့အချိန်မှာဘဲ ပေါက်ကွဲတာ။ သူရဲ့ လက်တစ်ဖက်က ပြတ်သွားတာ။ မျက်နှာမှာလည်း ညိုမဲကုန်တာ” လို့ ပြောပါတယ်။
ပေါက်ကွဲမှု ဖြစ်ပွါးပြီးနောက် ည ၁၀ နာရီအရောက်မှာပဲ သေဆုံးသွားခဲ့တယ်လို့ ဆိုပါတယ်။
“ငါးဖမ်းတဲ့ လူတွေ သူအပါ စုစုပေါင်း ၆ ယောက်ပါတယ်။ ဖြစ်တဲ့နေရာနဲ့ ရွာက ဝေးတယ်ဆိုတော့ လမ်းတစ်ဝက်မှာ သေသွားတာ။ အဲဒါနဲ့ ရွာထဲပေးမဝင်တော့ဘူး။ သူသေသွားတဲ့နေရာမှာဘဲ ဘုန်းကြီးတွေက တရားသွားဟောတာ”
ဦးမင်းဇော်နဲ့အတူ ငါးဖမ်းလိုက်သွားတဲ့ နောက်ထပ်အမျိုးသား ၅ ဦးကတော့ ဘာမှထိခိုက်တာ မရှိဘူးလို့ သိရပါတယ်။
ကွတ်ခိုင်မြို့နယ်မှာ ပြီးခဲ့တဲ့ ၂၀၂၄ ခုနှစ် ဖေဖော်ဝါရီ ၁ ရက်မှာလည်း ဟိုနောင်အုပ်စု ဟိုဆိုင်(နမ့်ဆိုင်)ကျေးရွာမှာ လက်လုပ်မိုင်း ပေါက်ကွဲမှုကြောင့် ကလေး ၂ ဦး သေဆုံးပြီး ၂ ဦး ဒဏ်ရာရခဲ့ပါတယ်။
