ပို့လဘား၊ မတ်လ ၁၇ ရက်၊ နမ့်ခမ်း
ရှမ်းမြောက် နမ့်ခမ်းမြို့နယ် မန်စပ်ကျေးရွာအုပ်စုထဲမှာရှိတဲ့ ကျေးရွာတစ်ရွာက စိတ်ကျန်းမာရေးချို့ယွင်းတဲ့ အမျိုးသမီးတစ်ဦးကို မန်စပ်မှာ အလုပ်လာလုပ်တဲ့ အမျိုးသားတစ်ဦးက အဓမ္မပြုကျင့်ခဲ့တယ်လို့ ဖြစ်စဉ်သိရှိသူတစ်ဦးရဲ့ ပြောပြချက်အရ သိရပါတယ်။
အသက် ၂၀ အရွယ်လောက်သာရှိသေးတဲ့ အဲဒီအမျိုးသမီးကို ပြီးခဲ့တဲ့ ဖေဖော်ဝါရီ ၆ ရက်မှာ အဲဒီအမျိုးသားက လယ်ကွင်းတစ်ခုထဲ ခေါ်သွားပြီး အဓမ္မပြုကျင့်ခဲ့တာလို့ ဆိုပါတယ်။
“သူတို့နှစ်ယောက် ခိုးပြေးကြတယ်လို့ ပြောတယ်။ ဒါပေမယ့် ကောင်မလေးက စိတ်ကျန်းမာရေး ချို့ယွင်းတဲ့သူလေ။ သူတို့နှစ်ယောက်ခိုးပြေးတာ မဖြစ်နိုင်ဘူး။ ကောင်မလေးမှာက အမေပဲ ရှိတော့တယ်။ သူ့အဖေက ပထွေးပေါ့နော်။ အဲဒီယောကျာ်းလေးက သူ့မိဘဆီ ပိုက်ဆံ ၂ သိန်း လာပေးသွားတာ။ သူတို့လာပေးတဲ့ ပိုက်ဆံကို သူ့အမေက လက်မခံဘူး။ ရွာကဥက္ကဌတွေဆီ သွားပြောခိုင်းလိုက်တယ်။ သူ့ပထွေးကတော့ အဲဒီပိုက်ဆံ ၂ သိန်းကို ယူလိုက်ပြီး အဲကိစ္စကို ကျေအေးလိုက်တယ်” လို့ ဖြစ်စဉ်သိရှိသူတစ်ဦးက ပြောပါတယ်။
အဓမ္မပြုကျင့်ခဲ့တဲ့ အဲဒီအမျိုးသားဟာ မန်စပ်ကျေးရွာက ကျောက်တူးဖော်တဲ့ ကုမ္ပဏီတစ်ခုမှာ လာရောက်အလုပ် လုပ်ကိုင်သူတစ်ဦးဖြစ်တယ်လို့ ဆိုပါတယ်။
လက်ရှိမှာလည်း အဲဒီအမျိုးသားက တစ်စုံတစ်ရာအရေးယူခံရတာမျိုး မရှိပဲ အဲကျောက်ကုမ္ပဏီမှာပဲ အလုပ်လုပ်ကိုင်နေပြီး လွတ်မြောက်နေတယ်လို့ သိရပါတယ်။
ပြီးခဲ့တဲ့ ၂၀၂၄ ခုနှစ် ဇွန်လ ၇ ရက်ကလည်း နမ့်ဆန်မြို့နယ်ထဲက ကျေးရွာတစ်ခုမှာ အသက်မပြည့်သေးတဲ့ အမျိုးသမီးငယ်တစ်ဦးကို ဦးလေးဖြစ်သူက အဓမ္မပြုကျင့်ခဲ့တဲ့စဉ်ဖြစ် ဖြစ်ပွားခဲ့ပါတယ်။
