မိုင်းရူပ၊ မတ်လ ၁၄ ရက်၊ တန့်ယန်း
စစ်ကောင်စီနဲ့ “ဝ”တပ်မတော်- UWSA ထိန်းချုပ်ထားတဲ့ ရှမ်းမြောက် တန့်ယန်းမြို့နယ်မှာ ကျားဖြန်လုပ်ကိုင်သူ ၁၆၆ ဦးကို ဖမ်းဆီးရမိခဲ့တယ်လို့ စစ်ကောင်စီက မနေ့ မတ်လ ၁၃ ရက်မှာ သတင်းထုတ်ပြန်ထားပါတယ်။
ပြီးခဲ့တဲ့ မတ်လ ၁၂ ရက်မှာ နားဟုတ်ကျေးရွာအုပ်စုအတွင်းရှိ ကျားဖြန်ရုံကို စစ်ကောင်စီတပ်က ဝင်ရောက်စီးနင်းခဲ့ရာ တရုတ်နိုင်ငံသား ၁၆၅ ဦး၊ မြန်မာနိုင်ငံသား ၁ ဦးနဲ့ ကျားဖြန်ရုံအတွင်း အသုံးပြုခဲ့တဲ့ ပစ္စည်းတွေကို သိမ်းဆည်းရမိခဲ့တယ်လို့ ဆိုပါတယ်။
သိမ်းဆည်းရမိတဲ့ ပစ္စည်းတွေထဲ Star Link ၂ စုံ၊ ဖုန်းမျိုးစုံ အလုံး ၃၀၊ ကွန်ပျူတာ ၅ လုံးနဲ့ ဆက်စပ်ပစ္စည်း ပါဝင်တယ်လို့ ဖော်ပြထားပါတယ်။
တန့်ယန်းမှာ အခြေစိုက်တဲ့ စစ်ကောင်စီရဲ့ ဗျူဟာမှူးတွေ အပြောင်းအလဲ လုပ်ပြီးနောက် အသစ် ရောက်လာတဲ့ စစ်ကောင်စီရဲ့ ဗျူဟာမှူးဟာ ကျားဖြန်ရုံတွေကို လိုက်လံ စီးနင်းတာတွေ ပြုလုပ်နေတာလို့ တန့်ယန်းဒေသခံ အမျိုးသမီးတစ်ဦးက ရွှေဖီမြေကို ပြောပါတယ်။
“ကျားဖြန်က လုံးဝ ပပျောက်သွားတာတော့ မဟုတ်ဘူး။ အခုက လိုက်ဖမ်းနေတော့ နည်းနည်းငြိမ်နေတယ်။ အခု အသစ်ရောက်တဲ့ ဗျူဟာမှူးတွေက စဖမ်းနေပြီလို့ ပြောတာပဲ။ ဖမ်းတော့ ဖမ်းနေတာပဲ။ ဟန်ပြ ဖြစ်မလား။ အခုမှ အသစ်ရောက်လာတယ်ဆိုတော့ ပြောလို့ မရသေးဘူး”
ကျားဖြန်ရုံမှာ ဖမ်းဆီးရမိတဲ့ တရုတ်နိုင်ငံသားတွေကို လူသားချင်း စာနာထောက်ထားတဲ့အနေနဲ့ သက်ဆိုင်ရာနိုင်ငံထံ လွှဲပြောင်းပေးသွားမယ်လို့ စစ်ကောင်စီက ပြောဆိုထားပါတယ်။
ပြီးခဲ့တဲ့ ၂၀၂၄ ခုနှစ် နိုဝင်ဘာလထဲမှာလည်း ရှမ်းမြောက် တန့်ယန်းမြို့နယ်ထဲ ကျားဖြန်လုပ်ကိုင်သူ ၁ ထောင်ကျော်ကို UWSA က ဖမ်းဆီးရမိခဲ့ပြီး တရုတ်နိုင်ငံသား ၇၆၂ ဦးကို တရုတ်ထံ လွှဲပြောင်းပေးခဲ့ဖူးပါတယ်။
ပြီးခဲ့တဲ့ ဇန်နဝါရီ ၃၀ ရက်ကနေ မနေ့ မတ်လ ၁၃ ရက်အထိ အွန်လိုင်း ငွေလိမ်ဂိုဏ်းတွေမှာ လုပ်ကိုင်နေသူ ၆,၀၁၅ ဦးကို ဖမ်းဆီးနိုင်ခဲ့တယ်လို့ စစ်ကောင်စီရဲ့ သတင်းထုတ်ပြန်ချက်ထဲ ဖော်ပြထားပါတယ်။
ဖမ်းဆီးရမိသူတွေထဲက ၃,၂၁၃ ဦးကို သက်ဆိုင်ရာ နိုင်ငံတွေထံ လွှဲပြောင်းပေးခဲ့ပြီလို့ စစ်ကောင်စီက ပြောဆိုထားပါတယ်။
