ရွှေဖီမြေ၊ မတ်လ ၁၃ ရက်၊ နမ့်ခမ်း
၁၉၅၈ ခုနှစ်မှာ စတင်ခဲ့တဲ့ ရှမ်းပြည်တော်လှန်ရေးနဲ့ ၁၉၆၃ ခုနှစ်မှာ ဖွဲ့စည်းခဲ့တဲ့ ပလောင်အမျိုးသားတပ်ဦး- PNF မှာ ပါဝင်ခဲ့တဲ့ ရဲဘော်ဟောင်းတွေကို တအာင်းတပ်မတော်- PSLF/TNLA ရဲ့ ဒုဥက္ကဌ ဒုဗိုလ်ချုပ်ကြီး တားဂျုတ်ဂျားကိုယ်တိုင် ဂုဏ်ပြုချီးမြှင့်ခဲ့တယ်လို့ တအာင်းတပ်က ထုတ်ပြန်လာပါတယ်။
မတ်လ ၁၁ ရက်မှာ ဂုဏ်ပြုချီးမြှင့်ပွဲကို ရှမ်းမြောက် နမ့်ခမ်းမြို့နယ်ထဲ ပြုလုပ်ခဲ့ပြီး PNF နဲ့ ပလောင်ပြည်နယ် လွတ်မြောက်ရေးအဖွဲ့- PSLO/PSLA မှာ တာဝန်ထမ်းဆောင်ခဲ့တဲ့ ရှမ်း ၇ ဦး၊ တအာင်း ၇ ဦးနဲ့ လီဆူ ၁ ဦး စုစုပေါင်း ၁၅ ဦးအတွက် တစ်ဦးကို ဂုဏ်ပြချီးမြှင့်ငွေ ၁၀ သိန်း၊ ရွှေဆုတံဆိပ်နဲ့ ဂုဏ်ပြုမှတ်တမ်းလွှာ ပေးအပ်ခဲ့ပါတယ်။
အခမ်းအနားမှာ ဒုဗိုလ်ချုပ်ကြီး တားဂျုတ်ဂျားက PNF မရှိရင် PSLO/PSLA တပ်ဖွဲ့ ဖြစ်မလာနိုင်ဘဲ PSLO/PSLA မရှိရင် TNLA တပ်မတော်လည်း ဖြစ်မလာနိုင်ဘူးလို့ ပြောကြားခဲ့ပါတယ်။
ဒါကြောင့် တစ်ချိန်က PNF နဲ့ PSLO တပ်ဖွဲ့မှာ တာဝန်ထမ်းဆောင်ခဲ့တဲ့ ရဲဘော်ရဲမေတွေကို PSLF/TNLA အနေနဲ့ တအာင်းလူထုကိုယ်စား အမြဲအောက်မေ့ သတိရနေကြောင်း ပြောကြားခဲ့တယ်လို့ ဖော်ပြထားပါတယ်။
ဂုဏ်ပြုပွဲအခမ်းအနားသို့ ဒုဗိုလ်ချူပ်ကြီး တားဂျုတ်ဂျားနဲ့ ဒုဗိုလ်မှူးကြီး တားကောင်ဝါည်၊ ဗိုလ်မှူး တားပ္လါင်ကဒူး၊ ဗိုလ်မှူး တားဆဲင်အံင်၊ နမ့်ခမ်းရှိ ဌာနဆိုင်ရာ တာဝန်ရှိသူနဲ့ ဒေသခံလူထု ၂၀၀ ကျော် တက်ရောက်ခဲ့ပါတယ်။
