မြတ်နိုး၊ မတ်လ ၁၃ ရက်၊ ပူတာအို
ကချင်ပြည်နယ် ပူတာအိုခရိုင် ခေါင်လန်ဖူးမြို့နယ်ရှိ လန်ဆယ်ဒေသမှာ ရွှေတူးဖော်မှုနဲ့ ပတ်သက်ပြီး ကချင်တပ်မတော်- KIA ဘက် တာဝန်ပေးထားသူက ရွှေလုပ်ကွက်အတွက် ဒေသခံနဲ့ သဘောတူညီမှုမရှိဘဲ ဒေသခံတွေရဲ့ မြေဧက ထောင်ချီ သိမ်းယူနေကြောင်း ရွှေဖီမြေက စုံစမ်းသိရှိရပါတယ်။
“ဒီရက်ပိုင်း KIO/KIA ဘက်က ရွှေတူးဖော်မှုနဲ့ ပတ်သက်ပြီး တာဝန်ပေးထားတဲ့လူက အာဏာ အလွှဲသုံးစား လုပ်၊ ဒေသခံတွေရဲ့ မြေဧက တစ်ထောင်ကျော် သိမ်းပြီး ရွှေတူးဖို့ လုပ်နေတာ” လို့ ဒေသခံ အမျိုးသားတစ်ဦးက ပြောပါတယ်။
KIA ရဲ့ လုပ်ရပ်ဟာ ဒေသခံတွေ လက်မခံနိုင်တဲ့ အတိုင်းအတာအထိ ဖြစ်နေတာကြောင့် လန်ဆယ်ဒေသခံတွေ လိုင်ဇာအထိ သွားရောက်ပြီး ဒေသခံရဲ့ သဘောထားဆန္ဒကို တင်ပြခဲ့ကြရတယ်လို့ သူက ပြောပါတယ်။
“ဒေသခံတွေရဲ့ ဘိုးဘွားပိုင် ခြံမြေတွေကို သိမ်းလိုက်တဲ့လုပ်ရပ်ကို ဒေသခံတွေက လက်မခံနိုင်ဘူး။ ဘာကိစ္စနဲ့ သူတို့အတွက် သီးသန့် ဧကတစ်ထောင်ကျော်တောင် သိမ်းရတာလဲ။ ကုမ္ပဏီနဲ့ သွားတာက ပြဿနာမဟုတ်ဘူး။ အခုက တစ်ဦးတစ်ယောက်အကျိုးအတွက် သိမ်းနေတာ” လို့ နောက်ထပ် ဒေသခံတစ်ဦးက ပြောပါတယ်။
ဗဟိုကနေ ရွှေတူးဖော်မှုနဲ့ ပတ်သက်ပြီး ဦးဆောင်ကော်မတီအနေနဲ့ တာဝန်ပေးလိုက်တဲ့အဖွဲ့က လန်ဆယ်မှာ ရွှေမှော်ပိုင်းကို တာဝန်ယူဖို့ ရောက်လာပြီး အဓိက ဦးဆောင်နေသူတစ်ဦးက အာဏာပါဝါကို အလွှဲသုံးစား လုပ်တဲ့ပုံစံနဲ့ သူ့ရဲ့ လူကြီးအတွက်ဆိုပြီး ဧက ထောင်ကျော် သိမ်းလိုက်တာလို့ သူက ရှင်းပြပါတယ်။
“မနေ့က ဒေသခံတွေဆီက သိရတာ ဧက ၂,၁၀၀ လို့ ကြားတယ်။ KIO/KIA ဘက်ကတော့ တစ်နိုင်တစ်ပိုင် ရွှေတူးမယ့် ဒေသခံတွေကို အခွန်ကင်းလွတ်ခွင့် ပေးမယ်လို့ ကြားတယ်။ လက်ရှိတော့ တစ်နိုင်တစ်ပိုင် ဒေသခံတွေကို ပိတ်ထားဆဲ ဖြစ်တယ်။ သူတို့လည်း “၀”အဖွဲ့အစည်းတွေနဲ့ ပေါင်းလုပ်မယ်ကြားတယ်” လို့ ပူတာအို ဒေသကို စောင့်ကြည့်နေတဲ့ လူငယ်တစ်ဦးက ပြောပါတယ်။
အရင် ပြည်သူ့စစ်က ဒေသခံတွေနဲ့ လာတိုင်ပင်သလိုမျိုး KIO/KIA ဘက်ကလည်း တာဝန်ပေးထားတဲ့အဖွဲ့ကို ဒေသခံတွေကအဲဒီလို ဖြစ်စေချင်ကြတယ်လို့ သူက ပြောပါတယ်။
ဒါ့အပြင် ရွှေမှော် ပိတ်သိမ်းချိန် စက်ဆိုင်းတွေ ရွှေ့ခိုင်းတာ ရှိပေမဲ့ တစ်နိုင်တစ်ပိုင် လုပ်ကိုင်သူတွေက ရွှေမှော် ပြန်ဖွင့်မယ် ထင်တာကြောင့် မရွှေ့ယူသေးတဲ့ သိန်းရာချီတန် စက်ဆိုင်းတချို့နဲ့ ယာယီတဲလည်း မီးရှို့ဖျက်ဆီးခံခဲ့ရတာ ရှိတယ်လို့ ဒေသခံတွေက ပြောပါတယ်။
ဒေသခံတွေက လက်ရှိ ဘိုးဘွားစဉ်ဆက် ပိုင်ဆိုင်ခဲ့တဲ့ မြေတွေကို ရွှေလုပ်ကွက်အတွက်ဆိုပြီး ပုဂ္ဂလိကအကျိုးဆန်ဆန် ဧက ထောင်ချီ သိမ်းယူလိုက်တာကို လုံးဝ လက်မခံနိုင်တာကြောင့် KIO/KIA ဗဟို အထိ တင်ပြထားဆဲဖြစ်ပြီး ဒေသခံရဲ့ သဘောထားဆန္ဒအတိုင်း အရေးယူဆောင်ရွက်ပေးဖို့ မျှော်လင့်နေကြတယ်လို့ ပြောဆိုပါတယ်။
