ယာရူစိင်၊ မတ်လ ၁၃ ရက်၊ ဒီးမော့ဆို
ကရင်နီပြည် ဒီးမော့ဆိုမြို့နယ် အရှေ့ဘက်ခြမ်းရှိ စစ်ရှောင်စခန်းကို စစ်ကောင်စီတပ်က လေကြောင်းနဲ့ တိုက်ခိုက်တာကြောင့် အမျိုးသား ၁ ဦး ထိခိုက်ဒဏ်ရာ ရခဲ့ပါတယ်။
ပြီးခဲ့တဲ့ မတ်လ ၁၁ ရက် ည ၇ နာရီခွဲခန့်က ဒီးမော့ဆိုရှိ စစ်ရှောင်စခန်းတစ်ခုကို စစ်တပ်က လေကြောင်းနဲ့ သုံးကြိမ် လာရောက်ပြီး ဗုံး ၁၅ လုံးထက်မနည်း ကြဲချတိုက်ခိုက်ခဲ့တယ်လို့ ကရင်နီ အရေးပေါ်ကယ်ဆယ်ရေး- CTER-Karenni က မနေ့ မတ်လ ၁၂ ရက်မှာ ထုတ်ပြန်ထားပါတယ်။
“စစ်ရှောင်စခန်းတစ်ခုလုံးကို အကုန်ကြဲသွားတယ်။ အသက် ၄၀ အရွယ်ရှိတဲ့ အမျိုးသားတစ်ယောက်တော့ ဒဏ်ရာ ရရှိတယ်။ စစ်ရှောင်စခန်းက တဲအိမ်တွေလည်း အများဆုံး ပျက်စီးသွားတယ်” လို့ မြေပြင်အခြေအနေသိရှိသူတစ်ဦးက ရွှေဖီမြေကို ပြောပါတယ်။
စစ်တပ်ဟာ ကရင်နီပြည်ကို လက်နက်ကြီးပစ်ခတ်မှုအပါအဝင် ဒရုန်းနဲ့ လေကြောင်းတိုက်ခိုက်မှုလည်း အကြိမ်ကြိမ် ပြုလုပ်နေသလို စစ်ရှောင်လူထုတွေကိုသာ ပစ်မှတ်ထားပြီး တိုက်ခိုက်နေကြောင်း CTER-Karenni ရဲ့ ထုတ်ပြန်ချက်ထဲ ဖော်ပြထားပါတယ်။
ပြီးခဲ့တဲ့ ဖေဖော်ဝါရီ ၁၃ ရက်မှာလည်း ဂျက်လေယာဉ်နဲ့ ဗုံးကြဲတိုက်ခိုက်ခဲ့တာကြောင့် ဒီးမော့ဆိုအနောက်ခြမ်းရှိ စာသင်ကျောင်းနဲ့ ဆေးပေးခန်းတစ်ခုအပါအဝင် အဆောက်အဦးတချို့ ပျက်စီးခဲ့ပါတယ်။
အာဏာသိမ်းပြီး ၄ နှစ်ကျော်အတွင်း စစ်တပ်ရဲ့ တိုက်ခိုက်မှုကြောင့် ကရင်နီပြည်မှာ အရပ်သား ၆၀၀ ကျော် သေဆုံးခဲ့ကြောင်း ကရင်နီ လူမှုအသင်းအဖွဲ့များကွန်ရက်က ထုတ်ပြန်ထားပါတယ်။
