လွေးထွေး၊ မတ်လ ၁၂ ရက်
ရှမ်းမြောက်မှ မြို့နယ်တချို့က ကားသမားတွေဟာ မန္တလေးမြို့ဘက် ပုံမှန် သွားလာလို့ရနေပေမဲ့ စစ်ကောင်စီတပ်ရဲ့ ခွင့်ပြုကုန်တွေသာ တင်ဆောင်ခွင့် ရသလို လမ်းကြေးလည်း သိန်းဆယ်ချီအထိ ပေးနေရတယ်လို့ ကုန်ကားသမားတစ်ဦးက ပြောပါတယ်။
စစ်ကောင်စီရဲ့ ခွင့်ပြုကုန်တွေဖြစ်တဲ့ ကြက်စာ၊ ဝက်စာ၊ နောက်ချေးနဲ့ ကုန်စုံ စတာတွေကိုသာ သယ်ဆောင်ခွင့်ပြုပြီး မန္တလေးမြို့ဘက် သယ်ဆောင်သွားတဲ့ လက်ဖက်တင်တဲ့ ကားတွေကိုလည်း ပုံစံအမျိုးမျိုးနဲ့ စစ်ဆေးရေးဂိတ်တိုင်းက စစ်ဆေးနေကြတာအပြင် ကုန်ကားတစ်စီးကို ကျပ်သိန်း ၂၀ နီးပါး ပေးပြီး ဖြတ်သန်းနေရတယ်လို့ ဆိုပါတယ်။
ကုန်ကားသမားတစ်ဦးက “အတက်က သူတို့ သတ်မှတ်ထားတဲ့ ကုန်တွေဘဲ တင်ပြီး တက်ကြတယ်။ တခြားကားတွေ တော်တော်များများက ခါလီပဲ တက်ကြတယ်။ သူတို့က တခြားကုန်ထက် လက်ဖက် တင်တဲ့ကား ပိုစစ်တယ်။ ငွေ ပိုတောင်းတယ်” လို့ ပြောပါတယ်။
စစ်ကောင်စီက ရှမ်းမြောက်ဘက် တင်ပို့ဖို့ ကန့်သတ်ထားတဲ့ ကုန်တွေဟာ ဆန်၊ ဆီ၊ ဆားအပြင် လျှစ်စစ်ပစ္စည်း၊ ကုန်မာနဲ့ ရေပိုက်တွေ ဖြစ်ပါတယ်။
နောက်ထပ် နမ့်ဆန်မြို့မှ ကားပိုင်ရှင် အမျိုးသားတစ်ဦးက “အခုကာလ အတက်အဆင်း လုပ်တာ ဘယ်တန်မလဲ။ တချို့အခေါက်ဆို အရင်းတောင် ရှုံးတယ်။ ဒါပေမဲ့ လုပ်စားဖို့ လိုနေတော့ သွားလာရတာဘဲ။ ကိုယ့်ကုန်တွေက လက်ဖက်ဆိုတော့ လမ်းမှာစောင့်တဲ့ စစ်သားတွေက ပြောတာတော့ ရှိတာပေါ့။ နင်တို့လက်ဖက် ဘာလို့ ဒီဘက် ပို့တာလဲ။ နင်တို့ဘဲ စားလေတဲ့။ မတတ်နိုင်ဘူးလေနော်” လို့ ပြောပါတယ်။
ဒါ့အပြင် ရှမ်းမြောက် နောင်ချိုနဲ့ မန္တလေးတိုင်း ပြင်ဦးလွင်ကြားမှာလည်း ရှမ်းမြောက်က ကုန်ကားအပြင် ခရီးသည်ကားအားလုံးကို စစ်တပ်က ဆမ္မဆယ်ကွင်းလမ်းနဲ့ သုံးဆယ်ကွင်းလမ်းကနေသာ သွားခိုင်းပြီး တစ်ရက်ကို ကားအစီးရေ ၁၅၀ သာ ပေးဖြတ်တာကြောင့် လမ်းမှာ တစ်ပတ်ကျော်ကြာ ကား တန်းစီနေရပြီး သောင်တင်နေကြရတယ်လို့ ကားသမားတွေရဲ့ ပြောပြချက်အရ သိရပါတယ်။
