မိုင်းရူပ၊ မတ်လ ၁၂ ရက်၊ မိုးကုတ်
တအာင်းတပ်မတော်- PSLF/TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့မှာ လူမျိုးစုတိုင်း ပါဝင်တဲ့ မြို့လုံခြုံရေးတပ် ဖော်ဆောင်ဖို့ TNLA က ပြင်ဆင်နေတယ်လို့ ရွှေဖီမြေက စုံစမ်းသိရှိရပါတယ်။
TNLA က အုပ်ချုပ်ရေးမှူးတွေကို အစည်းအဝေး ခေါ်ယူပြီး တအာင်းလူမျိုးအပြင် လူမျိုးစုတိုင်း ပါဝင်တဲ့ မြို့လုံခြုံရေးတပ်ကို ဖော်ဆောင်ဖို့ ပါဝင်လိုသူကို စာရင်းကောက်ခံဖို့ ပြောဆိုထားတယ်လို့ မိုးကုတ်မြို့ခံ အမျိုးသားတစ်ဦးက ရွှေဖီမြေကို ပြောပါတယ်။
“တအာင်းလူမျိုးတွေကိုတော့ TNLA ကိုယ်တိုင် လာခေါ်တယ်။ တခြားလူမျိုးတွေကိုတော့ ရပ်ကွက်လူကြီးကနေတဆင့် စာရင်း ကောက်ခိုင်းတာ။ ရွာအပေါ် မူတည်ပြီး ကောက်သွားမှာ။ တစ်ရွာကို ၃၀ လား၊ ၅၀ လား အဲလိုပေါ့”
မြို့လုံခြုံရေးအတွက် တာဝန်ထမ်းဆောင်မယ့်သူတွေကို TNLA က စစ်သင်တန်း ပေးသွားမှာဖြစ်ပြီး အလှည့်ကျစနစ်နဲ့ မြို့လုံခြုံရေးကို စောင့်ရမှာ ဖြစ်တယ်လို့ TNLA နဲ့ နီးစပ်သူတစ်ဦးက ရွှေဖီမြေကို ပြောပါတယ်။
“မိုးကုတ်ထဲမှာတော့ လူမျိုး မခွဲတော့ဘူး။ မြို့လုံခြုံရေးမှာ ပါဝင်တဲ့သူ အရေအတွက်အပေါ် မူတည်ပြီးတော့မှ စစ်သင်တန်း ပေးမယ်။ လက်နက် တပ်ဆင်ပေးမှာပေါ့။ ပြီးမှ မြို့တွင်းက တရားဥပဒေစိုးမိုးရေး လုပ်ငန်းတွေမှာ ဆောင်ရွက်လို့ရအောင် TNLA က စည်းရုံးထားတာ ရှိတယ်”
မြို့လုံခြုံရေးတပ်မှာ ပါဝင်သူအနေနဲ့ အမြဲတမ်း တာဝန်ထမ်းဆောင်စရာ မလိုဘဲ အလှည့်ကျစနစ်သာ တာဝန်ထမ်းဆောင်ရမှာ ဖြစ်တယ်လို့ သူက ဆက်ပြောပါတယ်။
“အမြဲတမ်း တာဝန်ထမ်းဆောင်စရာ မလိုဘူး။ တစ်လမှာ တစ်ရပ်ကွက် ၁ ယောက်ဆိုရင် အဲရပ်ကွက်မှာ အယောက် ၁၀၀ ရှိရင် သူအလှည့်ရောက်ဖို့ အကြာကြီး နေရအုံးမယ်”
မိုးကုတ်မှာ မြို့လုံခြုံရေးတပ် ဖော်ဆောင်နေတာနဲ့ ပတ်သက်ပြီး အသေးစိတ် သိရဖို့ PSLF/TNLA ရဲ့ ပြောရေးဆိုခွင့်ရှိသူ လွေးယေဦးကို ရွှေဖီမြေက ဆက်သွယ်မေးမြန်းနေဆဲ ဖြစ်ပါတယ်။
TNLA ရဲ့ စစ်မှုထမ်းဥပဒေအရ ညီအစ်ကို ၂ ဦးနဲ့အထက်ရှိတဲ့ အသက်ပြည့်ပြီးတဲ့ တအာင်းလူမျိုးတိုင်းဟာ တအာင်းတပ်ထံ တစ်ဦး စစ်မှုထမ်းရမယ်လို့ ဖော်ပြထားပါတယ်။
မြို့လုံခြုံရေးတပ် ဖော်ဆောင်ဖို့ လုပ်နေတဲ့ မိုးကုတ်မြို့ဟာ ၁၀၂၇ စစ်ဆင်ရေး ဒုတိယလှိုင်းအတွင်း TNLA နဲ့ ပူးပေါင်းတပ်က တိုက်ခိုက်သိမ်းပိုက်ထားပြီး အုပ်ချုပ်ရေးယန္တရား လည်ပတ်နေတဲ့မြို့လည်း ဖြစ်ပါတယ်။
