အိုက်ပွီး၊ မတ်လ ၁၁ ရက်၊ ဂန့်ဂေါ
မကွေးတိုင်း ဂန့်ဂေါမြို့နယ် စင်ပုံကျေးရွာအနီး စစ်သုံ့ပန်း ထားရှိတဲ့နေရာကို စစ်ကောင်စီတပ်က လေကြောင်းနဲ့ ဗုံးကြဲတိုက်ခိုက်လို့ CDM တပ်သား ၁ ဦး သေဆုံးပြီး စစ်သုံ့ပန်း ၄ ဦး ပြင်းထန်ဒဏ်ရာ ရရှိခဲ့တယ်လို့ စစ်ရေးနဲ့ နီးစပ်သူတစ်ဦးက ရွှေဖီမြေသို့ ပြောပါတယ်။
မနေ့ မတ်လ ၁၀ ရက် ည ၁၀ နာရီဝန်းကျင်မှာ ပေါင် ၅၀၀ ဗုံးသီးနှစ်လုံးနဲ့ လေကြောင်းကနေ ဗုံးကြဲတိုက်ခိုက်ခဲ့တာ ဖြစ်ပါတယ်။
“ဂန့်ဂေါနဲ့ ထီးလင်းအစပ် စင်ပုံရွာအနီးက စစ်သုံ့ပန်း ထားတဲ့နေရာကို ဗုံးကြဲသွားတာပါ။ CDM ပြုလုပ်ထားတဲ့ စစ်ကောင်စီတပ်သားတစ်ဦး သေဆုံးတယ်။ စစ်သုံ့ပန်း လေးယောက် ပြင်းထန်ဒဏ်ရာ ရတယ်။ ကျန်တဲ့ ၇ ယောက်လောက်က အနည်းငယ်စီ ဒဏ်ရာ ရကြတယ်” လို့ စစ်ရေးနဲ့ နီးစပ်သူတစ်ဦးက ရွှေဖီမြေသို့ ပြောပါတယ်။
ဗုံးကြဲခံရတဲ့ စစ်သုံ့ပန်းစခန်းမှာ တိုက်ပွဲအတွင်း ဖမ်းဆီးရမိတဲ့ စစ်သုံ့ပန်း ၆၄ ဦး ရှိတယ်လို့ သိရပါတယ်။
အလားတူ မနေ့ည ၁၂ ဝန်းကျင်မှာ စစ်ဘေးရှောင်တွေ နေထိုင်တဲ့ ဂန့်ဂေါမြို့နယ် ကျွန်းဒတ်ရွာကို လေကြောင်းကနေ ထပ်မံ ဗုံးကြဲ တိုက်ခိုက်ခဲ့တာကြောင့် နွား ၆ ကောင် သေဆုံးခဲ့တယ်လို့ သိရပါတယ်။
“ရှေ့ဆင့်နောက်ဆင့် လေကြောင်း တိုက်ခိုက်သွားတာပါ။ စစ်ဘေးရှောင်တွေနဲ့ ရွာသားတွေ နေထိုင်တဲ့နေရာကို ဗုံးကြဲသွားတာ။ လူကတော့ ထိခိုက်မှု မရှိပေမဲ့ ပြည်သူတွေ မွေးထားတဲ့ နွား ၆ ကောင်တော့ သေဆုံးခဲ့ပါတယ်” လို့ ဂန့်ဂေါမြို့နယ်ဒေသခံတစ်ဦးက ရွှေဖီမြေသို့ ပြောပါတယ်။
ပြီးခဲ့တဲ့ မတ်လ ၅ ရက်ကလည်း ဂန့်ဂေါမြို့နယ် ကန်ရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ အရပ်သား ၂ ဦး သေဆုံးခဲ့ပါတယ်။
