ခိုင်လေး၊ မတ်လ ၁၁ ရက်၊ နွားထိုးကြီး
မန္တလေးတိုင်း နွားထိုးကြီးမြို့နယ် ဝက်လူးရဲစခန်းကနေ ထွက်လာတဲ့ စစ်ကောင်စီစစ်ကြောင်းကို နွားထိုးကြီးမြို့နယ် ပြည်သူ့ကာကွယ်ရေးတပ်ဖွဲ့နဲ့ မဟာမိတ် ပူးပေါင်းတပ်ဖွဲ့က ကြားဖြတ်တိုက်ခိုက်ခဲ့တာကြောင့် စစ်သား ၂၅ ဦး သေဆုံးပြီး အရာရှိ ၂ ဦး အပါအဝင် ၁၄ ဦး ဖမ်းဆီးရမိခဲ့တယ်လို့ အမှတ်(၁) စစ်ဒေသက သတင်းထုတ်ပြန်ထားပါတယ်။
ပြီးခဲ့တဲ့ မတ်လ ၉ ရက်က ဝက်လူး ရဲစခန်းကနေ ထွက်လာတဲ့ တပ်မ ၁၀၁ လက်အောက်ခံ အင်အား ၂၀၀ ခန့်ပါတဲ့ စစ်ကောင်စီ စစ်ကြောင်းကို မြင်းခြံခရိုင် တပ်ရင်း ၄၊ ၁၀၊ နွားထိုးကြီးမြို့နယ် ပကဖ နဲ့ မဟာမိတ် ပူးပေါင်းအဖွဲ့က ကျတွင်းဘိုးရွာ အနောက်တောင်ဘက်မှာ ပူးပေါင်းတိုက်ခိုက်ခဲ့တာလို့ ဆိုပါတယ်။
“တိုက်ပွဲက မနက် ၉ နာရီကနေ နေ့လယ် ၂ နာရီခွဲလောက် ကြာတယ်။ အမှတ်(၁) စစ်ဒေသက ထုတ်ပြန်ထားတဲ့အတိုင်းပါဘဲ။ ဖမ်းဆီးရမိတဲ့ သုံ့ပန်းတွေကိုတော့ ဘယ်လိုထိန်းသိမ်းထားလဲ ဘယ်မှာ ထားလဲဆိုတာတော့ ပြောလို့ မရဘူး” လို့ နွားထိုးကြီး PDF မှ တာဝန်ရှိသူတစ်ဦးက ရွှေဖီမြေကို ပြောပါတယ်။
တိုက်ပွဲအတွင်း စစ်တပ်က မိတ္ထီလာနဲ့ တံတားဦး လေတပ်ကနေ ဂျက်တိုက်လေယာဉ်နဲ့ လေကြောင်း ၂ ကြိမ် တိုက်ခိုက်ခဲ့တာဖြစ်ပြီး နွားထိုးကြီးမြို့နယ် ပကဖဘက်မှ ရဲဘော် ၂ ဦး ကျဆုံးခဲ့တယ် လို့ ဆိုပါတယ်။
အဆိုပါ တိုက်ခိုက်မှုမှာ စစ်တပ်ရဲ့ MA-1 ၁၉ လက်၊ MA-2 ၂ လက်၊ MA-3 ၇ လက်၊ MA-5 ၂ လက်၊ MA-11 ၇ လက်၊ MA-12 ၁ လက်၊ G-3 ၂ လက်၊ G-4 ၁ လက်၊ ၆၀ မမ ပြောင်းတို ၂ လက်၊ ၈၁ မမ စိန်ပြောင်း ၁ လက်၊ 5.56 ကျည် (၁၂,၀၀၀)တောင့်၊ 7.62 ကျည် (၁,၀၄၅)တောင့်၊ ၉ မမ ကျည် ၁၉ တောင့်၊ ၆၀ မမ ကျည် ၂၈ လုံး၊ ၈၁ မမ ကျည် ၇ လုံး၊ RPG ကျည်အဖူး ၇ လုံး၊ RPG ပို့ကျည် ၈ တောင့်၊ အီနာဂါ ၂၁ လုံး၊ နင်းမိုင်း ၅ လုံး၊ လက်ပစ်ဗုံး ၁၁ လုံး၊ Laptop ၂ လုံး၊ ဆက်သွယ်ရေးစက် ၂ လုံး စုစုပေါင်း လက်နက် ၄၄ လက် သိမ်းဆည်းရမိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
