မိုင်းရူပ၊ မတ်လ ၁၁ ရက်၊ ဘားအံ
ကရင်နဲ့ မွန်ပြည်နယ်ကို ဆက်သွယ်ထားတဲ့ ဘားအံ-မော်လမြိုင် ကားလမ်းပေါ်မှာ ဂျိုင်းတံတားဖွင့်ပွဲ တက်ရောက်ခဲ့တဲ့ စစ်ကောင်စီဝန်ကြီးတွေကို ဒရုန်းနဲ့ ဗုံးကြဲတိုက်ခိုက်ခဲ့တယ်လို့ မွန်ပြည် လွတ်မြောက်ရေးတပ်တော်- MLA က မနေ့ မတ်လ ၁၀ ရက်မှာ ထုတ်ပြန်ထားပါတယ်။
မတ်လ ၉ ရက် မနက်ပိုင်းမှာ ဂျိုင်းတံတား ဖွင့်ပွဲကို တက်ရောက်ခဲ့တဲ့ စစ်ကောင်စီရဲ့ ဆောက်လုပ်ရေးဝန်ကြီးဌာန ပြည်ထောင်စုဝန်ကြီး ဦးမျိုးသန့်၊ ကရင်ပြည်နယ်ဝန်ကြီးချုပ် ဦးစောမြင့်ဦး၊ အရှေ့တောင် တိုင်းစစ်ဌာနချုပ် ဒုတိုင်းမှူး ဗိုလ်မှူးကြီး ဗညားဝင်းနဲ့ စစ်ကောင်စီခန့် ဌာနဆိုင်ရာ တာဝန်ရှိသူတွေကို ဒရုန်းနဲ့ ၃ ကြိမ် တိုက်ခိုက်ခဲ့တယ်လို့ ဆိုပါတယ်။
“သုံးကြိမ် ဗုံးကြဲတိုက်ခိုက်ခဲ့ပြီးတော့ စကစစစ်သား ၃ ဦး သေဆုံးပြီး ၅ ဦးထက်မနည်း ဒဏ်ရာ ရရှိခဲ့ပါတယ်။ စစ်ကောင်စီဘက်က တော်လှန်ရေးအဖွဲ့ဘက်ကို တုံ့ပြန်နိုင်ခဲ့ခြင်း မရှိပါဘူး” လို့ MLA ရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
ဒရုန်းနဲ့ ဗုံးကြဲတိုက်ခိုက်မှုကြောင့် အရပ်သားတစ်ဦး ထိခိုက်ဒဏ်ရာရတာ ရှိခဲ့ပြီး ဒေသခံတွေအနေနဲ့ စစ်ကောင်စီ ပြုလုပ်တဲ့ အခမ်းအနားနဲ့ တပ်စခန်းအနီးမှာ မနေထိုင်ကြဖို့ MLA က တိုက်တွန်းထားပါတယ်။
MLA ရဲ့ ဗုံးကြဲတိုက်ခိုက်မှုမှာ စစ်ကောင်စီဘက်က ထိခိုက်သေဆုံးတာ ရှိတယ်လို့ ပြောပေမဲ့ ရွှေဖီမြေအနေနဲ့ သီးခြားအတည်ပြုနိုင်ခြင်း မရှိသေးပါဘူး။
ဂျိုင်းတံတား ဖွင့်ပွဲမှာ ဒရုန်းနဲ့ တိုက်ခိုက်ခဲ့တာနဲ့ ပတ်သက်ပြီး စစ်ကောင်စီဘက်ကလည်း တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
