လွေးထွေး၊ မတ်လ ၁၀ ရက်၊ လားရှိုး
ကိုးကန့်တပ် MNDAA ထိန်းချုပ်ထားတဲ့ လားရှိုးမြို့နယ် ကြာကန်နောင်လိုင် (ခ) နောင်မိုကျေးရွာက အမျိုးသမီးတစ်ဦးဟာ ခြံရှင်းနေရင်း မပေါက်ကွဲသေးတဲ့ စစ်ကျန်လက်နက်ကို ပေါက်ပြားနဲ့ ပေါက်မိတာကြောင့် ပေါက်ကွဲမှုဖြစ်ပြီး ခန္ဓာကိုယ်တစ်ခုလုံး အပြင်းအထန် ဒဏ်ရာရခဲ့ကြောင်း အစ်မဖြစ်သူရဲ့ ပြောပြချက်အရ သိရပါတယ်။
အဲဒီအမျိုးသမီးဟာ အသက် (၃၀) ဝန်းကျင်အရွယ် ဒေါ်အမ်ခေါဝ်ဖြစ်ပြီး မနေ့ မတ်လ ၉ ရက် ညနေ ၃ နာရီ ဝန်းကျင်မှာ ဟင်းခြံထဲက မြက်ရှင်းနေရင်း စစ်ကျန်လက်နက်တစ်ခုကို ပေါက်မိတာ ဖြစ်ပါတယ်။
အမ်ခေါဝ်ရဲ့အစ်မဖြစ်သူက “သူပေါက်မိတာက မိုင်းလား၊ လက်နက်ကြီးလား၊ လက်ပစ်ဗုံးလား သေချာမသိရဘူး။ တိုက်ပွဲတွေဖြစ်ပြီးတော့ အဲခြံထဲကို သူကစပါးပြန်လာရိတ်သေးတယ်။ အဲချိန်ဘာမှမဖြစ်ဘူး” လို့ ရွှေဖီမြေသို့ ပြောပါတယ်။
၎င်းအမျိုးသမီးဟာ ခြေထောက်၊ လက်နဲ့ မျက်နှာက ဒဏ်ရာတွေကြောင့် ဒီနေ့ မတ်လ ၁၀ ရက်အထိတော့ လားရှိုးပြည်သူ့ဆေးရုံမှာ ကုသမှုခံယူနေရတယ်လို့ ဆိုပါတယ်။
ရွှေဖီမြေက ပြုစုထားတဲ့ စာရင်းအရ ရှမ်းမြောက် သီပေါ၊ နမ့်ခမ်း၊ ကွတ်ခိုင်စတဲ့ မြို့နယ်တွေမှာ တစ်လအတွင်း မြေမြှပ်မိုင်းနဲ့ စစ်လက်နက်အကြွင်းအကျန်ကြောင့် အရပ်သား ၇ ဦး သေဆုံးခဲ့ပြီး ၇ ဦး ထိခိုက်ဒဏ်ရာရခဲ့ပါတယ်။
