ပျားကြီး၊ မတ်လ ၈ ရက်၊ မန္တလေး
တနိုင်ငံလုံးမှာရှိတဲ့ အခြေခံပညာ ကိုယ်ပိုင်ကျောင်းတွေအနေနဲ့ နွေရာသီသင်တန်းတွေ မဖွင့်ဖို့ စစ်ကောင်စီက အဓမ္မပိတ်ပင်ထားတယ်လို့ ပညာရေးဝန်ထမ်းတွေက ပြောပါတယ်။
နွေရာသီကျောင်းပိတ်ရက်ကာလ ၃ လအတွင်း ကိုယ်ပိုင်ကျောင်းတွေမှာ ဖွင့်လှစ်လေ့ရှိတဲ့ သင်တန်းတွေအားလုံးကိုရပ်ပစ်ဖို့ စစ်ကောင်စီလက်အောက်ခံ ပညာရေးဝန်ကြီးဌာနက ညွှန်ကြားထားတာဖြစ်ပါတယ်။
“အဓိက ကတော့ စစ်ကောင်စီလက်အောက်ကကျောင်းတွေမှာ လူနည်းတော့ ကိုယ်ပိုင်ကျောင်းတွေကို ဖိအားပေးတာပေါ့။ ကိုယ်လည်း မလုပ်နိုင်ဘူး။ လုပ်နိုင်တဲ့သူတွေ လုပ်နေတော့လည်း မနာလိုစိတ်ကြီးပြီး ကဖျက်ယဖျက်လုပ်တာ။ ကိုယ်ပိုင်ကျောင်းအားလုံးက လာမယ့်ကျောင်းဖွင့်ချိန်ကျမှပဲ ပြန်ဖွင့်ရတော့မှာ” လို့ မန္တလေးမြို့ခံ ပညာရေးဝန်ထမ်းတစ်ဦးက ပြောပါတယ်။
လက်ရှိအချိန်မှာ မန္တလေးမြို့မှာရှိတဲ့ ကိုယ်ပိုင်ကျောင်းတွေအားလုံးဟာ သင်တန်းကြေး ပေးသွင်းထားမှုတွေအတွက် ငွေပြန်အမ်းပေးမှုတွေ ပြုလုပ်နေပေမဲ့ ရန်ကုန်မြို့နဲ့ နေပြည်တော်က ကျောင်းတချို့ကတော့ ကျောင်းဖွင့်ထားဆဲဖြစ်ပြီး အခြေအနေကို စောင့်ကြည့်နေတယ်လို့ ကိုယ်ပိုင်ကျောင်း တည်ထောင်သူတစ်ဦးက ဆိုပါတယ်။
စစ်ကောင်စီက ကိုယ်ပိုင်ကျောင်းတွေကိုနွေရာသီသင်တန်းတွေ ဖွင့်ခွင့်အဓမ္မပိတ်ပင်ထားပေမဲ့ အခြေခံပညာကျောင်းတွေမှာတော့ ပန်းချီ၊ ပန်းပုနဲ့ အားကစားသင်တန်းတွေ၊ ယဥ်ကျေးလိမ်မာသင်တန်းတွေကို ဖွင့်လှစ်နေပြီး ကိုယ်ပိုင်ကျောင်းက ကျောင်းသား ကျောင်းသူတွေကိုလည်းအချိုးကျ တက်ရောက်စေဖို့လည်း ညွှန်ကြားထားတယ်လို့ ပညာရေးဝန်ထမ်းတွေက ပြောပါတယ်။
