ပျားကြီး၊ မတ်လ ၈ ရက်၊ မန္တလေး
မန္တလေးမြို့၊ ပုသိမ်ကြီးမြို့နယ်၊ ကြာနီကန်ကျေးရွာက နေအိမ်ပေါင်း ၈၀ ကျော်ကို လမ်းနယ်ဆိုတဲ့အကြောင်းပြချက်နဲ့ စစ်ကောင်စီက စက်ယန္တရားတွေသုံးပြီး ဖြိုဖျက်ပစ်ခဲ့တယ်လို့ ဒေသခံတွေက ပြောပါတယ်။
မန္တလေး – မတ္တရာလမ်းမကြီးနဲ့ အေးရိပ်ငြိမ်သုဿန်အဝင်လမ်းဆုံမှာရှိတဲ့ လူနေအိမ်တွေကို မတ်လ ၄ ရက်နေ့ကနေ ၆ ရက်နေ့အထိ စက်ယန္တရားတွေနဲ့ အဓမ္မဖြိုဖျက်ခဲ့တာ ဖြစ်ပါတယ်။
“၃ ရက်နေ့ညကမှသိရတာ ဖျက်ရမယ်ဆိုတာ။ ကျွန်တော်တို့က ကျူးကျော်တွေမဟုတ်ဘူးလေ။ ရွာမြေတွေပေါ်မှာ နေကြတာ။ ဆိုင်တွေ ဖွင့်ထားကြတာလေ။ အခုကျ သက်သက်အနိုင်ကျင့်တာပေါ့” လို့ ဒေသခံတစ်ဦးက ပြောပါတယ်။
မန္တလေးမြို့နဲ့ ၄ မိုင်ကျော်ပဲ ကွာဝေးတဲ့ ကြာနီကန်ကျေးရွာအနီးက ထီးတော်မိုးကျေးရွာမှာ စစ်ကောင်စီရဲ့ အမှတ် (၅) လျှပ်စစ်နဲ့ စက်မှုအင်ဂျင်နီယာတပ်ရင်း၊ အမှတ် (၂) စစ်သားစုဆောင်းရေးတပ်ရင်းတို့ရှိနေပြီး မတ္တရာမြို့နယ်တခုလုံးကို လက်နက်ကြီးနဲ့ အဓိက ပစ်ခတ်တိုက်ခိုက်မှုတွေ ပြုလုပ်နေတဲ့နေရာဖြစ်တာကြောင့် နယ်မြေရှင်းလင်းဖို့အတွက် အခုလို လုပ်ဆောင်တာဖြစ်နိုင်တယ်လို့ ဒေသခံတွေက ခန့်မှန်းနေကြပါတယ်။
အခုလို နေအိမ်တွေ ဖြိုချဖျက်စီးမှုကို စစ်ကောင်စီတပ်တွေနဲ့ ပျူစောထီးတွေက မန္တလေး – မတ္တရာလမ်းတလျောက်မှာ လုံခြုံရေးအပြည့်အဝရယူ လုပ်ဆောင်ခဲ့တာဖြစ်ပြီး နေအိမ်တွေ ဖြိုဖျက်မှုကိုမှတ်တမ်းတင် ဓာတ်ပုံရိုက်ကူးသူ (၅) ဦးထက်မနည်းကိုလည်း ကိုယ်ထိလက်ရောက်ရိုက်နှက်မှုတွေ ပြုလုပ်ခဲ့တယ်လို့ မျက်မြင်တွေ့သူတွေက ဆိုပါတယ်။
