မိုင်းပန်ပျော်၊ မတ်လ ၈ ရက်၊ ကွတ်ခိုင်
ရှမ်းမြောက် ကွတ်ခိုင်မြို့နယ် မုံးစီးဒေသမှာ ရွှေဆက်မတူးဖို့ ဒေသခံတွေနဲ့ ကိုးကန့်တပ်မတော် MNDAA တို့က သဘောတူညီမှု ရလိုက်တယ်လို့ ဒေသခံတွေဆီက သိရပါတယ်။
မနေ့ မတ်လ ၇ ရက်မှာ ဒေသခံတွေနဲ့ ကိုးကန့်တပ်ရဲ့ တာဝန်ရှိသူတွေက တွေ့ဆုံဆွေးနွေးပြီးနောက် ရွှေတူးဖော်မှုတွေ ဆက်မလုပ်ဖို့ဆိုတဲ့ ဒေသခံတွေရဲ့ တောင်းဆိုချက်ကို ကိုးကန့်တပ်က သဘောတူပေးခဲ့တယ်လို့ ဒေသခံအမျိုးသားတစ်ဦးက ရွှေဖီမြေကို ပြောပါတယ်။
“သေသွားတဲ့ကိစ္စကတော့ သူတို့ဆွေးနွေးတာ မပြီးသေးဘူးဖြစ်နေတာ။ အခုချိန်ထိသူတို့ညှိနေတုန်း။ တော်တော်နဲ့ မပြီးသေးဘူးလို့ပြောတယ် ပြဿနာက။ ရွှေဆက်မတူးဖို့တော့ သဘောတူတယ်လို့တော့ ကြားတယ်။ ဘယ်အဖွဲ့အစည်းမှလည်း တူးလို့မရတော့ဘူးလို့တော့ ကြားတယ်အဲဒါ”
ပြီးခဲ့တဲ့ မတ်လ ၅ ရက်က ပြိန်းခမ်းကျေးရွာအနီးမှာရှိတဲ့ ရွှေလုပ်ကွက်ကို MNDAA က ရွှေတူးနေစဉ် KIA တပ်ဖွဲ့နဲ့ ဒေသခံတွေက ဆက်မတူးဖို့ သွားရောက်တားဆီးရာကနေ ပစ်ခတ်မှုဖြစ်ပြီး KIA တပ်သား ၂ ဦးအပါအဝင် ၆ ဦး သေဆုံးပြီး ၆ ဦးထက်မနည်း ထိခိုက်ဒဏ်ရာရရှိခဲ့တာ ဖြစ်ပါတယ်။
သေဆုံးသွားတဲ့ KIA တပ်သားတွေနဲ့ ဒေသခံတွေရဲ့ အသုဘစရိတ်အပြင် ထိခိုက်ဒဏ်ရာရသွားသူတွေရဲ့ ဆေးကုသစရိတ်ကိုလည်း ကိုးကန့်တပ်မတော် MNDAA က တာဝန်ယူဖြေရှင်းပေးမယ်လို့ ဒေသခံတွေက ပြောပါတယ်။
