ပို့လဘား၊ မတ်လ ၈ ရက်၊ ကရင်
ကရင်အမျိုးသားအစည်းအရုံး (KNU)ထိန်းချုပ်ထားတဲ့ ကရင်ပြည်နယ် လယ်ဒိုမြို့နယ်နဲ့ မူးမြို့နယ်ကို စစ်ကောင်စီတပ်က လေကြောင်းနဲ့ ဗုံးကြဲတိုက်ခိုက်ခဲ့လို့ အရပ်သား ၃ ဦး သေဆုံးပြီး ၂ ဦးထိခိုက်ဒဏ်ရာရရှိခဲ့တယ်လို့ KNU ကဒီနေ့ မတ်လ ၈ ရက်မှာ ထုတ်ပြန်ထားပါတယ်။
ဖြစ်စဉ်ဟာ ပြီးခဲ့တဲ့ မတ်လ ၆ ရက် နေ့လည် ၂ နာရီဝန်းကျင်မှာ လယ်ဒိုမြို့ ကျောက်ကြီးပေါက်ကျေးရွာနဲ့ မူးမြို့နယ် မကျဉ်းတောကျေးရွာကို စစ်ကောင်စီတပ်က ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာ ဖြစ်ပါတယ်။
KNU ရဲ့ ပြောရေးဆိုခွင့်ရှိသူ ပဒိုစောတောနီးက”စစ်ခေါင်းဆောင်ကိုယ်တိုင်ကတော့ တရားစစ်ဆင်နွှဲနေပါတယ်။ တရားသောစစ် မတရားသောစစ်ဆိုတာ ပြည်သူလူထုက ကိုယ်တိုင်ကြုံတွေ့နေရတာဆိုတော့ ပြည်သူလူထုကလည်း ကောင်းကောင်းနားလည်ပါတယ်။ အဲလိုလုပ်ခြင်းအားဖြင့် သူတို့ရှုံးနေတဲ့စစ်ကို ဘယ်လိုမှကာလို့မရတော့ပါဘူး။ တဖြည်းဖြည်း စစ်ရာဇဝတ်မှု နွံထဲမှာပဲ ကျွံပြီးကျွံ နွံပြီးနွံ ဘယ်လိုမှရုန်းထွက်လို့မရတော့ဘူးလို့ ကျနော်တို့ တွေ့မြင်နေရတယ်”လို့ ပြောပါတယ်။
၎င်းသေဆုံးသွားတဲ့သူဟာ အသက် ၆၃ နှစ်နဲ့ အသက် ၅၃ နှစ်အရွယ် အမျိုးသမီးနဲ့ အသက် ၅၅နှစ်အရွယ်ရှိအမျိုးသားတစ်ဦးတို့ဖြစ်ပြီး အသက် ၁၅ နှစ်အရွယ်နဲ့ ၂၄ နှစ်အရွယ်ရှိ အမျိုးသမီးနှစ်ဦးက ထိခိုက်ဒဏ်ရာရရှိခဲ့တာဖြစ်ပါတယ်။
ပြီးခဲ့တဲ့ မတ်လ ၅ နာရီ ညနေ ၄ နာရီဝန်းကျင်မှာလည်း ကမမောင်းမြို့နယ်က ကျောက်ကွင်းကြီးဘုန်းကြီးကျောင်းကို စစ်ကောင်စီတပ်က လေကြောင်းနဲ့ ဗုံးကြဲခဲ့လို့ ကျောင်းထိုင်ဆရာတောတစ်ပါး ဗုံးစထိမှန်ပြီး ပျံလွန်တော်မူသွားခဲ့ပါတယ်။
