လွေးထွေး၊ မတ်လ ၇ ရက်၊ ကရင်
ကရင် အမျိုးသားအစည်းအရုံး(KNU) ထိန်းချုပ်ထားတဲ့ ကရင်ပြည်နယ် ဖာပွန်ခရိုင် ကမမောင်းမြို့နယ်က ကျောက်ကွင်းဘုန်းကြီးကျောင်းကို လေကြောင်းနဲ့ဗုံးကြဲခဲ့လို့ ကျောင်းထိုင် ဆရာတော်တစ်ပါး ဗုံးစထိမှန်ပြီး ပျံလွန်တော်မူသွားခဲ့ကြောင်း သိရပါတယ်။
ဖြစ်စဉ်ဟာ မတ်လ ၅ ရက် ညနေ ၄ နာရီ ဝန်းကျင်မှာဖြစ်ပြီး ဂျက်လေယာဉ်နဲ့ ဗုံးကြဲခဲ့လို့ အသက် ၆၂ နှစ် ဝါတော် ၄၁ ဝါရှိ ကျောင်းထိုင်ဆရာတော် အန္နန္တဝိသုန္ဒကို ဗုံးဆထိမှန်ခဲ့တာ ဖြစ်ပါတယ်။
“ကျောင်းပေါ်တည့်တည့်ကျတော့ ပျံလွန်တော်မူတဲ့ ဘုန်းကြီးဆိုရင် လက်တွေလည်းပြတ် တကိုယ်လုံးရစရာမရှိတော့ဘူး။ ကိုရင်လေးတွေ တချို့ကတော့ စိုးရိမ်ရတယ်။ တချို့ကတော့ ပွန်းပဲ့ လောက်တာဘဲ” လို့ ဖြစ်စဉ်ကိုသိရသူ ကမမောင်းမြို့နယ်မှ အမျိုးသားက ဆိုပါတယ်။
၎င်းနေရာကို ဗုံးကြဲတိုက်ခိုက်လို့ ဘုန်းကြီးကျောင်းတစ်ခုလုံး ပျက်စီးခဲ့တဲ့အပြင် ကိုရင်လေးတွေလည်း အများအပြားထိခိုက်ဒဏ်ရာရခဲ့ပြီး ဆေးကုသမှုခံယူနေရ တယ်လို့ ဆိုပါတယ်။
အလားတူ ဒီနေ့ မတ်လ ၇ ရက် မနက်အစောပိုင်းမှာလည်း တိုက်ပွဲနေ့စဉ်ဖြစ်ပွားနေတဲ့ သောင်းရင်းမြစ်အနီးကို စစ်ကောင်စီတပ်က ဂျက်ဖိုက်တာနဲ့ ဗုံးကြဲချတိုက်ခိုက်ခဲ့ပေမယ့် ထိခိုက်မှုအသေးစိပ်ကိုတော့ မသိရသေး ပါဘူး။
ပြီးခဲ့တဲ့နှစ် ၂၀၂၄ ခုနှစ်အတွင်း KNU ထိန်းချုပ်ဒေသကို စစ်ကောင်စီတပ်က လေကြောင်း၊ ဒရုန်း နဲ့ လက်နက်ကြီး အကြိမ် ၁၀၀ ကျော် ပစ်ခတ်တိုက်ခိုက်ခဲ့တာကြောင့် အရပ်သား ၄ ဦး သေဆုံးခဲ့ပြီး ၂၂ ဦး ထိခိုက်ဒဏ်ရာရခဲ့ကြောင်း KNU က မတ်လ ၅ ရက်မှာ ထုတ်ပြန်ထားတဲ့ ထုတ်ပြန်ချက်အရ သိရပါတယ်။
