မိုင်းပန်ပျော်၊ မတ်လ ၆ ရက်၊ ကွတ်ခိုင်
တအာင်းတပ်မတော်-TNLA ထိန်းချုပ်ထားတဲ့ ကွတ်ခိုင်မြို့နယ် ဟိုခိုကျေးရွာက နေအိမ်တစ်ခုမှာ အိမ်ရှင်ဖြစ်သူက အပြင်သွားနေတဲ့အချိန် မီးလောင်မှုဖြစ်ပွားခဲ့တယ်လို့ ဒေသခံတွေဆီက သိရှိရပါတယ်။
ဒီနေ့ နေလယ်ပိုင်း ၃ နာရီဝန်းကျင် မီးစလောင်တာဖြစ်တယ်လို့ မျက်မြင်တွေ့ရှိသူအမျိုးသမီးတစ်ဦးက ရွှေဖီမြေကိုပြောပါတယ်။
“ဘာကြောင့်လောင်တာလည်းတော့မသိဘူး။ အဲ့ဒီအိမ်ကလူတွေက တောင်ယာသွားတာ အိမ်မှာကျန်တဲ့တစ်ယောက်ကစိတ်ကျန်းမာရေးမကောင်းဘူး။ အိမ်မှာသူတစ်ယောက်ပဲရှိတော့ သူက တံခါးပိတ်ပြီး သူများအိမ်သွားလည်တာ ဘယ်သူမှလည်းမမြင် မီးစလောင်တဲ့ချိန် သူမီးမငြိမ်းလို့ လောင်သွားတာထင်တယ်”
မီးလောင်မှုဖြစ်ပွားနေတဲ့အချိန် မီးသတ်ရုံးအဆက်အသွယ်မရတာကြောင့် ရွာသားတွေကိုယ့်အိမ်မှာရှိတဲ့ရေနဲ့ပဲ မီးငြိမ်းနိုင်ခဲ့တယ်လို့ ၎င်းကဆက်ပြောပါတယ်။
အဆိုပါ မီးလောင်သွားခဲ့တဲ့အိမ်ဟာ ယာမာယွန်းတို့အိမ်လို့သိရပြီး ယာမာယွန်းရဲ့ သားသမီးတွေကတော့ တောင်ယာမှာအလုပ်သွားလုပ်နေတာကြောင့် မီးလောင်ခဲ့အိမ်ထဲမှာ ဆုံးရှုံးမှုအသေးစိတ်ကိုတော့ မသိရသေးဘူးလို့ ဆိုပါတယ်။
အလားတူပြီးခဲ့တဲ့ မတ်လ ၁ ရက်မှာလည်း မိုးမိတ်မြို့ သဲနီရပ်ကွတ်မှာ မီးဖိုဆောင်ထဲမှာ မီးမွေးထားရာကနေ မီးလောင်မှုဖြစ်ပွားခဲ့တယ်လို့ TNLA က ထုတ်ပြန်ထားပါတယ်။
ဒါ့အပြင် ပြီးခဲ့တဲ့ ဖေဖော်ဝါရီလ တစ်လအတွင်း တအာင်းဒေသမှာ မီးလောင်မှုဖြစ်ပွားခဲ့ကာ ဒေသခံ ၃ ဦး မီးလောင်ဒဏ်ရာရတဲ့အပြင် ပိုက်ဆံ သိန်း ၈၅၀ ဆုံးရှုံးခဲ့တယ်လို့ ထုတ်ပြန်ထားပါတယ်။
