ခိုင်လေး၊ မတ်လ ၆ ရက်၊ ကော့ကရိတ်
ကရင်ပြည်နယ်၊ ကော့ကရိတ်မြို့နယ်က ကျေးရွာတွေကို စစ်ကောင်စီတပ်က လေကြောင်းနဲ့ နှစ်ရက်ဆက်တိုက် ဗုံးကြဲတိုက်ခိုက်ခဲ့တာကြောင့် ဒေသခံ ၄ ဦး ထိခိုက်ဒဏ်ရာရခဲ့တယ်လို့ KNU က ဒီနေ့ မတ်လ ၆ ရက်နေ့မှာ ထုတ်ပြန်ထားပါတယ်။
မနေ့ မတ်လ ၅ ရက် မနက် အစောပိုင်း ၁ နာရီ ၃၀ မိနစ်က စစ်ကောင်စီတပ်က တိုက်လေယာဉ် ၁ စီးနဲ့ ကော့ကရိတ်မြို့နယ်၊ အစွန်းကျေးရွာကို တိုက်ပွဲဖြစ်ပွားခြင်းမရှိဘဲ ဗုံးကြဲတိုက်ခိုက်ခဲ့တာကြောင့် အမျိုးသမီး နှစ်ဦး ထိခိုက်ဒဏ်ရာ ရရှိပြီး နေအိမ် ၃ လုံးလည်း ထိခိုက်ပျက်စီးခဲ့ တယ်လို့ဆိုပါတယ်။
“ဗုံးကြဲခံ ရတဲ့ ရွာတွေမှာ က တိုက်ပွဲဖြစ်ပွားတာမျိုးမရှိဘူး။ အာရှလမ်းကို ထိမ်းချုပ်နိုင်ဖို့တပ်မဟာ (၆)ကျုံဒိုး မှာ အထိုင်ချ ပြီး အောင်ဇေယျ စစ်ကြောင်း ထိုးနေတာရှိတယ်။တပ်မဟာ (၇) ပိုင်ကျုံ ဘက်မှာလည်း တိုက်ပွဲ ဖြစ်နေတာရှိတယ်။အဲ့ကြောင့် လေကြောင်း တိုက်ခိုက်မှုတွေ များလာတယ်။ လက်ရှိ တပ်မဟာ ၆ ရော ၇ ရော တိုက်ပွဲပြင်းထန်နေပါတယ်” လို့ မြေပြင်အခြေအနေ သိရှိသူတစ်ဦးက ရွှေဖီမြေကိုပြောပါတယ်။
ပြီးခဲ့တဲ့ မတ်လ ၄ ရက်နေ့ မွန်းလွဲ ၁ နာရီကလည်း စစ်တပ်က လေကြောင်းနဲ့ ကော့ကရိတ်မြို့နယ်၊ ဘော့ဒိုင်းရွာ စာသင်ကျောင်းကို ဗုံးကြဲ တိုက်ခိုက်ခဲ့တာကြောင့် ဘော့ဒိုင်းရွာ က စာသင်ကျောင်း၊ ရေတွင်း၊ ရေကန် နဲ့ ဆိုင်ကယ် ၁ စီးထိမှန် ပျက်စီးခဲ့ပြီး ဒေသခံနှစ်ဦးလည်းထိခိုက် ဒဏ်ရာရရှိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
စစ်ကောင်စီတပ်က စစ်ရေးပစ်မှတ်မဟုတ်တဲ့ ဘာသာရေး အဆောက်အဦးတွေ၊ ပြည်သူ့ဆေးရုံဆေးခန်းတွေ၊ စာသင်ကျောင်းတွေနဲ့ အပြစ်မဲ့ ဒေသခံတွေနေထိုင်တဲ့ နေရာ တွေကို ပစ်မှတ်ထားပြီး ရည်ရွယ်ချက်ရှိရှိ လိုက်လံဗုံးကြဲ တိုက်ခိုက်နေတာဖြစ်တယ်လို့ ဆိုပါတယ်။
ဖေဖော်ဝါရီလ ကုန်ပိုင်းကတည်းက ကော့ကရိတ်မြို့နယ် တောင်ပိုင်းမှာ စစ်ကောင်စီတပ်က အင်အားအလုံးအရင်းနဲ့ ထိုးစစ်ဆင်လာတာကြောင့် တိုက်ပွဲပြင်းထန်နေပြီး နှစ်ဖက်ထိခိုက် သေဆုံးတာတွေရှိတယ်လို့ ဆိုပါတယ်။
