မိုင်းပန်ပျော်၊ မတ်လ ၆ ရက်၊ ကွမ်းလုံ
တရုတ်ရဲ့ကြားဝင်စေ့စပ်မှုကြောင့် စစ်ကောင်စီ နဲ့ MNDAA တို့ကြား ဆွေးနွေးခဲ့ကြပြီး အပစ်ရပ်တဲ့နောက်ပိုင်းမှာ ကိုးကန့်တပ်မတော်-MNDAA ထိန်းချုပ်ထားတဲ့ မြို့နယ်အချို့မှာ လျှပ်စစ်မီးတွေ ပြန်ရနေတယ်လို့ ရွှေဖီမြေက စုံစမ်းသိရှိရပါတယ်။
MNDAA ထိန်းချုပ်ထားတဲ့ ရှမ်းမြောက် ကွမ်းလုံ လောက်ကိုင်၊ ချင်းရွှေဟော်၊ နမ့်စလပ် မြို့နယ်တွေမှာ ပြီးခဲ့တဲ့ ဖေဖော်ဝါရီလ နောက်ဆုံးပတ်စပြီး မီးရလာတယ်လို့ ရွှေဖီမြေသတင်းရင်းမြစ်က ပြောပါတယ်။
“မီးကတော့ အရင်လ နောက်ဆုံးပတ်ကစပြီးတော့ ရပါတယ်။ ထိန်းချုပ်ထားတဲ့ မြို့တွေအကုန်တော့ မဟုတ်ဘူး ဒီဘက်ခြမ်းမှာဆိုရင် လောက်ကိုင် ချင်းရွှေဟော် နမ့်စလပ် တွေရတယ် ကွမ်းလုံကတော့ ဒီလ ၂ ရက်နေ့မှရတယ်။ ဟိုဘက်မှာဆိုရင် လားရှိုးမှာလည်းရပြီ”လို့ ဆိုပါတယ်။
အခုလက်ရှိ ကိုးကန့်တပ်မတော် ပေးလိုက်လျှပ်စစ်မီးဟာ စစ်ကောင်စီလက်ထက်ကတုန်းကလို မီတာပေါက် မဟုတ်ဘဲ မီတာကဒ်စနစ်နဲ့ ပေးနေလို့ ၎င်းကဆိုပါတယ်။
“မီတာခကတော့ သူတို့က ကဒ်စနစ်နဲ့ပေါ့နော် တရုတ်ကမီးလို့တော့ ကြားသိရတယ်။ မီတာခက အရင်က စကစလက်ထက်လို မီတာပေါက်နဲ့မဟုတ်ပဲနဲ့လေ မီတာ ကဒ်စနစ်နဲ့ပေါ့။ ကိုယ်က မီတာဖိုး ယွမ်တစ်ရာထည့်ရင်။ ယွမ်တစ်ရာဖိုးရမယ် အဲ့ဒီယွမ်တစ်ရာဖိုးကုန်သွားရင် မီးကလည်းသူ့ဟာသူ ပြတ်သွားမယ်”
နမ့်စလပ်၊ ကွမ်းလုံ၊ လောက်ကိုင်၊ ချင်းရွှေဟော်မြို့တွေအပြင် တစ်ခြားမြို့တွေကိုလည်း မီးရဖို့ဆက်လက်လုပ်ဆောင်နေတာလည်းရှိတယ်လို့ ဆိုပါတယ်။
ကိုးကန့်ဒေသဖက်ကို ကုန်စည်တင်သွင်းခွင့်နဲ့ လျှပ်စစ်မီးတွေပြန်ရတာဟာ တရုတ်ရဲ့ ကြားဝင်စေ့စပ်မှုကြောင့် MNDAA နဲ့ စစ်ကောင်စီတိုကြားတွေ့ဆုံဆွေးနွေးပြီးတဲ့နောက်ပိုင်း ရလာဖြစ်တယ်လို့ဆိုပါတယ်။
ကိုးကန့်တပ်မတော်ဟာ ၁၀၂၇ စစ်ဆင်ရေးအတွင်မှာရှမ်းမြောက်က လောက်ကိုင်၊ ကုန်းကြမ်း၊ သိန္နီ၊ တာမိုးညဲ၊ ချင်းရွှေဟော်၊ ကြူကုတ် ဖောင်းစိုင် နဲ့ လားရှိုးအစရှိတဲ့ မြို့နယ်တွေကို တိုက်ခိုက်သိမ်းပိုက်ထားပြီး အုပ်ချုပ်ရေးယန္တရားဖော်ဆောင်နေပါတယ်။
