ပို့လဘား၊ မတ်လ ၅ ရက်၊ မုံးစီး
ကွတ်ခိုင်မြို့နယ် မုံးစီးကျေးရွာမှာ ကိုးကန့်တပ်မတော် (MNDAA)နဲ့ ကချင်လွတ်မြောက်ရေးတပ်မတော် KIAတို့က စကားများ ရန်ဖြစ်ပြီး ပစ်ခတ်မှုဖြစ်လို့ KIA တပ်သား၂ ဦးနဲ့ ဒေသခံ ၃ ဦး သေဆုံးပြီး ၉ ဦးထိခိုက်ဒဏ်ရာရရှိခဲ့တယ်လို့ ဖြစ်စဉ်သိရှိသူ အမျိုးသားတစ်ဦး ပြောပြချက်အရ သိရပါတယ်။
ဒီနေ့ မတ်လ ၅ ရက် နေ့လည် ၁၂ နာရီဝန်းကျင်မှာ မုံးစီးကျေးရွာ ဗြိန်းခမ်းကျေးရွာအနီးမှာရှိတဲ့ ရွှေလုပ်ကွက်ကို MNDAAက ရွှေတူးနေစဉ် KIAနဲ့ စကားများရန်ဖြစ်ရာကနေ ပစ်ခတ်တာတွေဖြစ်ခဲ့တယ်လို့ ဆိုပါတယ်။
“ကိုးကန့်တွေက ရွှေလာတူးနေတာ။ ရွာသားနဲ့ KIA တွေကသွားတားတယ်လို့ ပြောတယ်။ KIAဘက်က အရင်ဆုံးလက်နဲ့ သွားရိုက်တယ်လို့တော့ ပြောတယ်။ အဲဟာနဲ့ပဲ ကိုးကန့်ဘက်က သေနတ်နဲ့ ပစ်လိုက်တာပဲ။ KIA တပ်သားဘက်လည်း သေတယ်။ သေတဲ့သူကများတယ် ထိခိုက်ဒဏ်ရာရတဲ့သူက ဆေးရုံမှာလည်း ရှိတယ်။ အခုကားပေါ်မှာလည်းရှိတယ် ” လို့ ပြောပါတယ်။
အဆိုပါကိစ္စနဲ့ ပတ်သက်ပြီး မုံစီးမှာရှိတဲ့ ကချင်လူမျိုးဒေသခံတွေဟာ မုံစီးမြို့ပေါ်တက်လာပြီး ကိုးကန့်တပ်ရှိတဲ့ မြို့နယ်ရုံးတွေဆီ လာရောက်ဆန္ဒလာပြနေကြတယ်လို့ ဆိုပြီး ဖြစ်စဉ်အသေးစိတ်ကို ဆက်လက်စုံစမ်းနေဆဲ ဖြစ်ပါတယ်။
ဖြစ်စဉ်နဲ့ပတ်သက်ပြီး ကိုးကန့်ရဲ့ သတင်းနဲ့ ပြန်ကြားရေးနဲ့ KIAက တာဝန်ရှိသူတွေကို ရွှေဖီမြေက ကြိုးစား ဆက်သွယ်နေဆဲ ဖြစ်ပါတယ်။
