မိုင်းရူပ၊ မတ်လ ၄ ရက်၊ မိုးကုတ်
တအာင်းတပ်မတော် TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့မှာ အကျင့်စာရိတ္တပြုပြင်ပေးပြီး ပြန်လွှတ်ပေးခဲ့တယ်လို့ TNLA က မနေ့ မတ်လ ၃ ရက်မှာ ထုတ်ပြန်ထားပါတယ်။
မူးယစ်ဆေးဝါး သုံးစွဲသူတွေကို TNLA က ၆ လကြာ အကျင့်စာရိတ္တပြုပြင်ရေးစခန်းမှာ အကျင့်စာရိတ္တပြုပြင်ပေးခဲ့ပြီးနောက် ပြီးခဲ့တဲ့ ဖေဖော်ဝါရီ ၂၅ ရက်မှာ ပြန်လွှတ်ပေးခဲ့တယ်လို့ ဆိုပါတယ်။
၆ လကြာ အကျင့်စာရိတ္တပြုပြင်ပေးပြီးပြန်လွှတ်ပေးသူတွေဟာ မူးယစ်ဆေးတွေ ထပ်မံသုံးစွဲရင် အကျင့်စာရိတ္တပြုပြင်ရေးစခန်းမှာ နောက်ထပ် ၃ နှစ်ကြာ နေရမှာဖြစ်တယ်လို့လည်း ထုတ်ပြန်ချက်ထဲမှာ ဖော်ပြထားပါတယ်။
လက်ရှိ မိုးကုတ်မြို့မှာ မူးယစ်ဆေးဝါးသုံးစွဲသူတွေ အရင်ကထက် ပိုလျော့နည်းလာတာတွေ့ရပြီး KTV ဆိုင်တွေမှာတော့ မူးယစ်ဆေးဝါးတွေ ပေါ်ပေါ်တင်တင်ဆက်ရနေတယ်လို့ ဒေသခံတွေက ပြောပါတယ်။
“အဓိက အဆိုးဆုံးကတော့ KTV တွေမှာပေါ့။ “K” တို့ ရွှေတို့ကတော့ မိုးကုတ်မှာ အခြေအနေ တော်တော်ဆိုးနေတယ်။ KTV တွေမှာ တင်းကြပ်လိုက်မယ်ဆိုရင်တော့ တော်တော် လျော့လာမယ်” လို့ မိုးကုတ်ဒေသခံတစ်ဦးက ရွှေဖီမြေကို ပြောပါတယ်။
မိုးကုတ်မြို့ကို ပြီးခဲ့တဲ့ ၂၀၂၄ ဇူလိုင်လ ၂၅ ရက်မှာ TNLA နဲ့ ပူးပေါင်းတပ်တွေက တိုက်ခိုက်သိမ်းပိုက်ခဲ့ပြီး စီမံအုပ်ချုပ်နေတာ ဖြစ်ပါတယ်။
PSLF/TNLA ထိန်းချုပ်ထားတဲ့ ဒေသတွေမှာ ပြီးခဲ့တဲ့ ၂၀၂၄ ခုနှစ်အတွင်း မူးယစ်ဆေးဝါးသုံးစွဲသူ (၁,၉၂၃) ဦးကို ဖမ်းဆီးနိုင်ခဲ့တယ်လို့ TNLA က ပြီးခဲ့တဲ့ ဇန်နဝါရီ ၂၈ ရက်မှာ သတင်းထုတ်ပြန်ထားပါတယ်။
