မိုင်းရူပ၊ မတ်လ ၄ ရက်
ရှမ်းတောင်-ကရင်နီနယ်စပ်နဲ့ ကရင်နီပြည်မှာ စစ်ကောင်စီတပ်ရဲ့ လက်နက်ကြီး၊ ဒရုန်းနဲ့ လေကြောင်းတိုက်ခိုက်မှုတွေကြောင့် ၁ လအတွင်း အရပ်သား ၅ ဦး သေဆုံးပြီး ၁၀ ဦးကျော် ဒဏ်ရာရခဲ့တယ်လို့ ကရင်နီအမျိုးသားများ ကာကွယ်ရေးတပ် KNDF က ထုတ်ပြန်ပါတယ်။
ပြီးခဲ့တဲ့ ဖေဖော်ဝါရီလအတွင်း ရှမ်းတောင် ဖယ်ခုံမြို့နယ်၊ မိုးဗြဲမြို့အပါအဝင် ကရင်နီပြည် လွိုင်ကော်နဲ့ ဒီမောဆိုမြို့နယ်တွေမှာ စစ်ကောင်စီတပ်ရဲ့ လက်နက်ကြီး၊ ဒရုန်းနဲ့ လေကြောင်းတိုက်ခိုက်မှုတွေကြောင့်
အသက်မပြည့်သေးတဲ့ ကလေးငယ် ၄ ဦးအပါအဝင် အရပ်သား ၅ ဦး သေဆုံးခဲ့တာဖြစ်ပြီး ၁၁ ဦး ထိခိုက်ဒဏ်ရာရခဲ့တယ်လို့ ဆိုပါတယ်။
ဒါ့အပြင် မိုးဗြဲမြို့မှာ စစ်ကောင်စီတပ်ရဲ့ လက်နက်ကြီးနဲ့ လေကြောင်းတိုက်ခိုက်မှုကြောင့် နေအိမ် ၅၀ ထက်မနည်းနဲ့ စာသင်ကျောင်း ၄ ကျောင်း၊ ဘာသာရေးအဆောက်အအုံ ၄ ခုလည်း ထိခိုက်ပျက်စီးခဲ့ပါတယ်။
ဒီမောဆိုအနောက်ခြမ်းမှာလည်း စစ်ကောင်စီတပ်ဟာ နေ့စဥ်လိုလို လက်နက်ကြီးနဲ့ ပစ်ခတ်တိုက်ခိုက်တာတွေ ပြုလုပ်နေပြီး ဒီနေ့ မတ်လ ၄ ရက်မှာလည်း စစ်ကောင်စီတပ်က ဒီမောဆိုအနောက်ခြမ်းကို လေယာဥ်နဲ့ ၂ ကြိမ် ဗုံးကြဲတိုက်ခိုက်ခဲ့တယ်လို့ ဒီမောဆိုအနောက်ခြမ်းရှိ အမျိုးသမီးတစ်ဦးက ပြောပါတယ်။
“လေယာဥ်နဲ့ ၂ ကြိမ် လာကြဲသွားတယ်။ ထိခိုက်မှုတော့ မသိရသေးဘူး။ ဒီမောဆိုကနေလည်း လက်နက်ကြီးတွေ ပစ်နေတာ။ လက်နက်ကြီးအစတောင် ကျမတို့နားအထိ ရောက်လာတယ်” လို့ ဆိုပါတယ်။
ပြီးခဲ့တဲ့ ဖေဖော်ဝါရီလအတွင်း ဖားဆောင်း၊ ဘောလခဲနဲ့ လွိုင်ကော်မြို့နယ်တွေမှာ စစ်ကောင်စီနဲ့ ကရင်နီတော်လှန်ရေး အင်အားစုတွေအကြား ထိတွေ့တိုက်ပွဲတွေ ဖြစ်ပွားခဲ့ပြီး ရှမ်းတောင် မိုးဗြဲမြို့မှာတော့ စစ်ကောင်စီတပ်က ထိုးစစ်ဆင်တိုက်ခိုက်နေတာကြောင့် တစ်လလုံးလုံး တိုက်ပွဲဖြစ်ပွားခဲ့တယ်လို့ KNDF က ဆိုပါတယ်။
ပြီးခဲ့တဲ့ ဖေဖော်ဝါရီ ၅ ရက်က မိုးဗြဲတိုက်ပွဲမှာ စစ်ကောင်စီတပ်ဘက်က ၇ ဦး သေဆုံးပြီး KNDF ဘက်ကလည်း ဖေဖော်ဝါရီလထဲက တိုက်ပွဲအတွင်း ရဲဘော် ၅ ဦး ကျဆုံးခဲ့တယ်လို့ ဆိုပါတယ်။
စစ်ကောင်စီတပ်ဘက်ကတော့ ကရင်နီပြည်က တိုက်ပွဲတွေနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
