ခိုင်လေး၊ မတ်လ ၄ ရက်၊ မြိုင်မြို့
မကွေးတိုင်း၊ မြိုင်မြို့နယ်၊ ဆင်စိန်ရွာက ဘုန်းကြီးကျောင်းကို စစ်ကောင်စီတပ်က လေကြောင်းနဲ့ ထပ်မံ ဗုံးကြဲတိုက်ခိုက်ခဲ့တာကြောင့် ဒေသခံ ၂ ဦး ပြင်းထန် ဒဏ်ရာရခဲ့တယ်လို့ အညာမြေတပ်ပေါင်းစု သတင်းနဲ့ပြန်ကြားရေးတာဝန်ခံ ကိုဘိုဘိုသန့်ဇင်က ရွှေဖီမြေကို ပြောပါတယ်။
ဒီနေ့မနက် ၁၀ နာရီ ဝန်းကျင်က မြိုင်မြို့နယ်၊ဆင်စိန်ကျေးရွာကဘုန်းတော်ကြီးကျောင်းကိုဂျက်ဖိုက်တာ ၁စီးနဲ့ ၃ကြိမ်တိတိ ပေါင်း၅၀၀ဗုံး ကြဲချခဲ့တာလို့ ဆိုပါတယ်။
“ဒဏ်ရာရ သူနှစ်ယောက်စလုံးက အရပ်သားပါ။ စိုးရိမ်ရတယ်။ တိုက်ပွဲဖြစ်ပွားတာမရှိပါဘူး။ စစ်ကြောင်းထိုးလာတာလဲ အခုရက်ပိုင်းမရှိဘူး ။ စစ်ကြောင်းပြန်သွားတာ ဆယ်ရက်လောက်ရှိပါပြီ”
အဆိုပါ တိုက်ခိုက်မှုကြောင့် ဘုန်းတော်ကြီးကျောင်းဆောင်တွေ ပျက်စီးတာ၊ ဘုန်းတော်ကြီးရဲ့ကားပျက်စီးတာတွေ ၊ ဘုရားစေတီပြိုကျတာ၊ စိန်ဖူးတွေမြေခရတာတွေ ဖြစ်ပွားခဲ့တယ် လို့ဆိုပါတယ်။
“ဗုံးလာကြဲတဲ့ရွာနဲ့ ဘုန်းတော်ကြီးကျောင်းက ပြည်သူအရပ်သားတွေ နေထိုင်ပြီး ရိုးရာတောင်သူလုပ်ငန်းတွေဘဲ လုပ်ကိုင်ကြတာ” အညာမြေတပ်ပေါင်းစု သတင်းနဲ့ပြန်ကြားရေးတာဝန်ခံ ကိုဘိုဘိုသန့်ဇင်က ဆက်ပြောပါတယ်။
မနေ့ မတ်လ ၃ ရက် ညသန်းခေါင်ချိန်က မြိုင်နဲ့ ပေါက်မြို့နယ်အစပ်မှာရှိတဲ့ လက်ပံတိုရေနံမှော်ကို ဗုံးကြဲတိုက်ခိုက် ခဲ့တာကြောင့် အမျိုးသား၊အမျိုးသမီး၊ကလေးငယ် စုစုပေါင်း ၁၅ဦး သေဆုံးခဲ့ပြီး ၂၀ ကျော် ဒဏ်ရာရရှိခဲ့တယ် လို့ဆိုပါတယ်။
ယခုရက်ပိုင်းအတွင်း မြိုင်မြို့နယ်အနောက်ခြမ်းနဲ့ ပေါက်မြို့နယ် အရှေ့မြောက်ခြမ်းကို စစ်တပ်က လေကြောင်းတိုက်ခိုက်မှု ဆက်တိုက်ပြုလုပ်နေတာကြောင့် လူစုလူဝေးမပြုလုပ်ကြဖို့နဲ့ လေကြောင်းရန်ကို သတိရှိရှိ နဲ့ နေထိုင်ကြဖို့ အညာမြေတပ်ပေါင်းစုမှ တိုက်တွန်းနှိူးဆော် ထားပါတယ်။
