ပို့လဘား၊ မတ်လ ၃ ရက်၊ ရေတာရှည်
ပဲခူးတိုင်း ရေတာရှည်မြို့နယ်မှာ ၁၂ နှစ်အရွယ်ရှိတဲ့ ကလေးငယ်တစ်ဦး မြေမြှုပ်မိုင်းနင်းမိလို့ ခြေထောက် ၂ ဖက်ပြတ်ထွက်သွားခဲ့တယ်လို့ ကူညီပေးသူတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ မတ်လ ၂ ရက် ညနေ ၃ နာရီအကျော်မှာ ရေတာရှည်မြို့နယ် ကျွန်းတောကုန်းရွာနေ မောင်ကြယ်စင်ဟိန်းဟာ မက်ပဲကောက်ရင်း အင်းစပ်အနီးမှာ မိုင်းနင်းမိခဲ့တယ်လို့ ဆိုပါတယ်။
“ကျောင်းဆင်းတဲ့ချိန်မှာဆို မက်ပဲကောက်သင်းကောက်ပြီး ရတဲ့ပိုက်ဆံလေးနဲ့ မိဘကိုကူညီနေတာ။ ဖြစ်ချင်တော့ သူအဲမက်ခင်းဘေးမှာရှိတဲ့ အင်းထဲကို ရေဆင်းသောက်ရင်းနဲ့ အင်းစပ်မှာ မိုင်းပေါက်တာ။ သူ့မိဘက သူ့ကိုခိုင်းတာမဟုတ်ဘူး။ သူအရမ်းလိမ္မာတယ် စာလဲတော်တယ်။ သူ့တို့မိသားစုက ဆင်းရဲတဲ့မိသားစုထဲကဆိုတော့ သူအားတဲ့ချိန်ဆို သူ့မိဘတွေ ကူညီပေးနေတာ” လို့ ပြောပါတယ်။
အဆိုပါမိုင်းနင်းခဲ့တဲ့ကျေးရွာဟာ စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော် (KNLA)တို့ စစ်ရေးလှုပ်ရှားတဲ့ နယ်မြေဖြစ်တယ်လို့ ပြောပါတယ်။
ပြီးခဲ့တဲ့ ၂၀၂၄ ခုနှစ် မတ်လ ၂၀ ရက်ကလည်း ရေတာရှည်မြို့နယ် ကံလှရွာမှာ စစ်ကျန်ဗုံးသီးအဟောင်းကို ဆော့ကစားရာကနေ ပေါက်ကွဲမှုဖြစ်လို့ ကလေး ၂ ဦးသေဆုံးပြီး ၁ ဦး ထိခိုက်ဒဏ်ရာရခဲ့ဖူးပါတယ်။
မြန်မာနိုင်ငံဟာ ကမ္ဘာမှာ မြေမြှုပ်မိုင်းနဲ့ ပေါက်ကွဲစေတတ်တဲ့ စစ်လက်နက်တွေကြောင့် သေဆုံးသူအများဆုံး ဖြစ်လာတယ်လို့ နိုင်ငံတကာ မြေမြှုပ်မိုင်းသုံးစွဲသူ ပပျောက်ရေး လှုပ်ရှားမှုအဖွဲ့-ICBL ရဲ့ ၂၀၂၄ နိုဝင်ဘာ ၂၀ ရက်ထုတ်ပြန်တဲ့ အစီရင်ခံစာမှာ ဖော်ပြထားပါတယ်။
