လွေးဇွန်မိုး၊ မတ်လ ၁ ရက်၊ ကွတ်ခိုင်
တအာင်းတပ်- TNLA ထိန်းချုပ်ထားတဲ့ ကွတ်ခိုင်မြို့နယ် နမ့်ဟူးဒဲ့ကျေးရွာက အသက် ၄၀ အရွယ် တာထွန်းဆိုင်ဟာ တောထဲ ထင်း သွားခုတ်ရင်း သေနတ်နဲ့ ပစ်သတ်ခံခဲ့ရပြီး သေဆုံးခဲ့တယ်လို့ ဒေသခံတွေဆီက သိရပါတယ်။
တာထွန်းဆိုင်ဟာ တုံဆင်လေးနဲ့ နမ့်ရာက်ရွာကြားမှာ ထင်းအငှား သွားခုတ်ပေးရင်း ပြီးခဲ့တဲ့ ဖေဖော်ဝါရီ ၂၆ ရက် ညပိုင်းမှာ နဖူးကို သေနတ်နဲ့ ပစ်ခတ်ခံခဲ့ရပြီး သေဆုံးသွားတာလို့ နမ့်ဟူးဒဲ့ရွာခံ အမျိုးသားတစ်ဦးက ပြောပါတယ်။
“၂၆ ရက်နေ့ နေ့လယ်ကတောင် သူ့ရဲ့ သူဌေးက သူစားဖို့ ဆန်တွေဘာတွေ သွားပို့ပေးခဲ့သေးတယ်လေ။ နောက်နေ့ နေ့လယ်လောက်ကြတော့ သူတို့က သူခုတ်ထားတဲ့ထင်း သွားသယ်မလို့ သွားကြည့်လိုက်တော့ သူက သေနေပြီ။ တောထဲဆိုတော့ ဘယ်သူကပစ်မှန်း မသိဘူးလေ။ တူမီးသေနတ်လိုလို ကျဥ်ဆန်အစစ်လိုလို ကျနော်တို့လည်း မပြောနိုင်ဘူး”
တာထွန်းဆိုင်ဟာ အေးအေးဆေးဆေး နေတတ်သူဖြစ်ပြီး တခြားသူနဲ့ စကားများ ရန်ဖြစ်တာ မရှိခဲ့ဖူးဘူးလို့ အထက်ပါ အမျိုးသားက ဆက်ပြောပါတယ်။
“သူက သူများနဲ့ စကားများ ရန်ဖြစ်တာတွေလည်း မရှိဘူး။ အဲလို ဆဲဆိုသောင်းကြမ်းတတ်တဲ့ လူစားမျိုးလည်း မဟုတ်ဘူး။ သူသေတဲ့နေရာက ရွာနဲ့ဝေးတော့ တူမီးနဲ့တောလိုက်တဲ့ မုဆိုးတွေပဲ ရှိလို့လား။ ဒါမှမဟုတ် တကယ်ပဲ သေနတ်အစစ်နဲ့လားတော့ ကိုယ်လည်း မသိဘူး။ ရွာအနီးအနားဆိုရင်တော့ တူမီးသေနတ်တွေ ပစ်ခွင့် မရှိဘူး”
တာထွန်းဆိုင်ရဲ့ အလောင်းကိုတော့ ပြီးခဲ့တဲ့ ဖေဖော်ဝါရီ ၂၇ ရက်ကတည်းက သင်္ဂြိုလ်ပေးခဲ့တယ်လို့ ဆိုပါတယ်။
လက်ရှိမှာ တာထွန်းဆိုင် ပစ်သတ်ခံရတာနဲ့ ပတ်သတ်ပြီး PSLF/TNLA ရဲ့ ကွတ်ခိုင်မြို့နယ် ရဲတပ်ဖွဲ့က စုံစမ်းစစ်ဆေးနေဆဲ ဖြစ်ပါတယ်။
