မိုင်းပန်ပျော်၊ မတ်လ ၁ ရက်၊ မိုင်းဝီး
တအာင်းတပ်မတော်- TNLA ထိန်းချုပ်ထားတဲ့ နမ့်ခမ်းမြို့နယ် မိုင်းဝီးကျေးရွာမှာ အသေခံဒရုန်းနဲ့ ဗုံးကြဲတိုက်ခိုက်ခံခဲ့ရပါတယ်။
ဖြစ်စဉ်ဟာ ဒီနေ့ မတ်လ ၁ ရက် မနက်အစောပိုင်း ၁၂ နာရီကျော်က မိုင်းဝီးဘုန်းကြီးကျောင်းခြံဝင်းမှာ အသေခံဒရုန်းနဲ့ဗုံး လာကြဲချခဲ့တယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
“မနေ့ည ဒရုန်းနဲ့ လာချသွားတာ လူအထိအခိုက်တော့ မရှိဘူး။ ထွက်ပြေးရတာပေါ့ဗျာ ကလေးတွေ ရှိတယ်လေ။ ဘုန်းကြီးကျောင်းမှာ။ အဲဒါနေရာပြောင်းရတာပေါ့။ ကိုယ့်စီ ကျမှာလည်း ကြောက်တယ်။ ဗုံးကျတာ နီးနီးလေးပဲလေ ကိုယ်တို့နဲ့”
အဆိုပါ ဒရုန်းဟာ ဘယ်ဘက်ကနေ လာတာလဲဆိုတာကိုတော့ မသိရှိရဘူးလို့ ၎င်းက ဆက်ပြောပါတယ်။
လက်ရှိမှာတော့ ဒရုန်း ၂ စီးကိုသာ ရှာဖွေတွေ့ရှိထားပြီး ၂ စီးကိုတော့ မတွေ့သေးဘူးလို့ ဆိုပါတယ်။
“ဒရုန်းက လက်လုပ်တွေပါ။ ကုမ္ပဏီနာမည်တွေလည်း ဖျက်ထားတယ်။ နောက်ဆက်တွဲ ဆက်စုံစမ်းနေတယ်။ ဘယ်သူ့လက်ချက်လဲဆိုတာ” ဆိုပြီး မြေပြင်ရှိ TNLA တပ်ဖွဲ့ဝင်တစ်ဦးက ပြောပါတယ်။
နမ့်ခမ်းမြို့နယ် မိုင်းဝီးရွာကို ပြီးခဲ့တဲ့ ၂၀၂၃ ဒီဇင်ဘာ ၅ ရက်မှာ TNLA က တိုက်ခိုက်သိမ်းပိုက်ခဲ့ပြီး ရွှေလီမြစ်ရဲ့ တစ်ဖက်ကမ်း မန်တပ်ရွာမှာ စစ်ကောင်စီရဲ့ တပ်စခန်း ကျန်ရှိနေဆဲ ဖြစ်ပါတယ်။
