လွေးဇွန်မိုး၊ မတ်လ ၁ ရက်၊ ကွတ်ခိုင်
တအာင်းတပ်- TNLA ထိန်းချုပ်ထားတဲ့ ရှမ်းမြောက် နမ့်ခမ်း၊ ကွတ်ခိုင်နဲ့ သီပေါမြို့နယ်မှာ မြေမြှုပ်မိုင်းနဲ့ မပေါက်ကွဲသေးတဲ့ စစ်လက်နက် အကြွင်းအကျန်ကြောင့် ပြီးခဲ့တဲ့ ဖေဖော်ဝါရီလအတွင်း အရပ်သား ၇ ဦးသေဆုံးပြီး ၇ ဦး ဒဏ်ရာ ရခဲ့ပါတယ်။
ဖေဖော်ဝါရီ ၁ ရက်ကနေ ၂၈ ရက်အထိ ကွတ်ခိုင်မြို့နယ်က ကလေး ၃ ဦး၊ သီပေါက အမျိုးသမီး ၁ ဦး၊ အမျိုးသား ၂ ဦးနဲ့ နမ့်ခမ်းက အမျိုးသား ၁ ဦး စုစုပေါင်း ၇ ဦး သေဆုံးပြီး ကွတ်ခိုင်က ကလေး ၃ ဦး၊ သီပေါက ကလေး ၃ ဦးနဲ့ အမျိုးသမီး ၁ ဦး စုစုပေါင်း ၇ ဦး ဒဏ်ရာ ရခဲ့ပါတယ်။
အထက်ပါ မြို့နယ် ၃ ခုမှာ မြေမြှုပ်မိုင်းကြောင့် ကလေး ၂ ဦး သေဆုံးခဲ့ပြီး ကလေး ၄ ဦးအပါအဝင် အမျိုးသား ၅ ဦး ဒဏ်ရာ ရခဲ့ပါတယ်။
ဒါ့အပြင် မပေါက်ကွဲသေးတဲ့ စစ်လက်နက်အကြွင်းအကျန်ကြောင့် ကလေး ၂ ဦးအပါအဝင် အမျိုးသား ၄ ဦး သေဆုံးခဲ့ပြီး ကလေး ၂ ဦး ထိခိုက်ဒဏ်ရာ ရခဲ့ပါတယ်။
မြန်မာနိုင်ငံဟာ ကမ္ဘာမှာ မြေမြှုပ်မိုင်းနဲ့ ပေါက်ကွဲစေတတ်တဲ့ စစ်လက်နက်တွေကြောင့် သေဆုံးသူ အများဆုံးနိုင်ငံဖြစ်လာတယ်လို့ နိုင်ငံတကာ မြေမြှုပ်မိုင်းသုံးစွဲမှု ပပျောက်ရေး လှုပ်ရှားမှုအဖွဲ့- ICBL ရဲ့ ၂၀၂၄ နိုဝင်ဘာ ၂၀ ရက် ထုတ်ပြန်တဲ့ အစီရင်ခံစာမှာ ဖော်ပြထားပါတယ်။
ပြီးခဲ့တဲ့ ၂၀၂၃ ခုနှစ်အတွင်း မြေမြှုပ်မိုင်းနဲ့ ပေါက်ကွဲစေတတ်တဲ့ စစ်လက်နက်အကြွင်းအကျန်ကြောင့် မြန်မာနိုင်ငံတစ်ဝှမ်းက လူ ၁ ထောင်ကျော် (၁,၀၀၃ ဦး) သေဆုံးခဲ့တယ်လို့ ICBL က ထုတ်ပြန်ထားပါတယ်။
