ပို့လဘား၊ ဖေဖော်ဝါရီ ၂၇ ရက်၊ ကွတ်ခိုင်
ကွတ်ခိုင်မြို့နယ် မိုင်းယုလေးကျေးရွာအုပ်စု ဟိုခိုရွာနေ အသက် ၁၉ နှစ်အရွယ် လွေးအေလာဝ်ဟာ တရုတ်ဘက် အလုပ်လုပ်ဖို့ သွားရာကနေ ၁ လ ကြာတဲ့အထိ အဆက်အသွယ်မရဘဲ ပျောက်ဆုံးနေတယ်လို့ မိသားစုဝင်တစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဇန်နဝါရီ ၂၉ ရက်က ဟိုခိုရွာကနေ မူဆယ်မြို့ဘက် သွားပြီးနောက် ရွှေလီမြို့ထဲ ပွဲစားကနေတဆင့် ခိုးပေါက်ကနေ ဝင်သွားခဲ့ကြပြီး လက်ရှိအချိန်ထိ အဆက်အသွယ်မရဘဲ ပျောက်ဆုံးနေတယ်လို့ ဆိုပါတယ်။
“ရွာကနေ မူဆယ် တက်လာတာ။ အဲဒီပွဲစားက အလုပ် ရှာပေးမယ်ပြောတာ။ နောက်ထပ် ပွဲစားနဲ့ မိတ်ဆက်ပေးပြီးတော့ ခိုးပေါက်နဲ့ လမ်းစရိတ်လည်း အကုန်စိုက်ပေးပြီး ခေါ်သွားတာ။ ၁ လပိုင်းကတည်းက အခုထိ ဘာမှအဆက်အသွယ် မရတော့ဘူး။ သတင်းအတိအကျတော့ မသိရသေးဘူး။ သူမှတ်ပုံတင်လည်း မရှိဘူး။ သူ့အမေကလည်း အိုနေပြီ။ နေ့တိုင်း ငိုနေတာ ရူးတော့မလို ဖြစ်နေပြီ “
လွေးအေလာဝ်နဲ့ အဆက်အသွယ် ပြတ်ပြီးနောက်ပိုင်း အမေဖြစ်သူနဲ့ မိသားစုဝင်က သူမ ရောင်းစားခံရမှာကို စိုးရိမ်နေတယ်လို့ ပြောပါတယ်။
ပြီးခဲ့တဲ့ ၂၀၂၄ အောက်တိုဘာလက နမ့်ခမ်းမြို့နယ် တာပုံရွာနေ အသက် ၁၈ နှစ်အရွယ် အမျိုးသမီးတစ်ဦးလည်း တရုတ်ပြည် ရွှေလီမြို့ဘက် အလုပ် သွားလုပ်ရာကနေ ၂ လကျော် ကြာတဲ့အထိ အဆက်အသွယ် မရဘဲ ပျောက်ဆုံးတဲ့ဖြစ်စဉ် ဖြစ်ပွားခဲ့ဖူးပါတယ်။
စစ်တပ်က အာဏာသိမ်းပြီးနောက်ပိုင်း အလုပ်အကိုင် ရှားပါးတာကြောင့် မြန်မာနိုင်ငံက လူထုတွေဟာ ပြည်ပသို့ တရားမဝင် နည်းလမ်းနဲ့ သွားရောက်ကာ အလုပ် လုပ်ကိုင်တာ များလာနေပြီး လူကုန်ကူးခံရတာ၊ ပျောက်ဆုံးနေတာတွေလည်း မကြာခဏ ကြုံတွေ့နေရပါတယ်။
