ပျားကြီး၊ ဖေဖော်ဝါရီ ၂၇ ရက်၊ ကြာအင်းဆိပ်ကြီး
ကရင်ပြည်နယ် ကြာအင်းဆိပ်ကြီးမြို့နယ်မှာရှိတဲ့ ပန်းအောင်ကျေးရွာက ဘုန်းတော်ကြီးကျောင်းကို စစ်ကောင်စီတပ်က လေကြောင်း တိုက်ခိုက်မှု ၂ ကြိမ် ပြုလုပ်ခဲ့တာကြောင့် ဘုန်းတော်ကြီး ၂ ပါးနဲ့ ဒေသခံ ၂ ဦး ထိခိုက်ဒဏ်ရာ ရရှိခဲ့တယ်လို့ ဒေသခံတွေက ပြောပါတယ်။
မနေ့ ဖေဖော်ဝါရီ ၂၆ ရက် နေ့လယ် ၂ နာရီဝန်းကျင်က MIG-29 နဲ့ Y-12 အမျိုးအစားလေယာဥ် အသုံးပြုပြီး ပေါင် ၅၀၀ ဗုံးတွေကြဲချခဲ့တာ ဖြစ်ပါတယ်။
“ဥပုသ်နေ့ဆိုတော့ သီလ ယူကြတဲ့သူတွေအများကြီး ရှိတယ်။ ဘုန်းကြီးတစ်ပါးက တော်တော်လေး စိုးရိမ်ရတယ်။ ဒကာ ၂ ယောက်လည်း ထိသွားတယ်။ ကျောင်းပေါ်တည့်တည့်မကျတာ အတော်ကံကောင်းတယ်ပြောရမှာ” လို့ ဒေသခံတစ်ဦးက ပြောပါတယ်။
ဘုန်းတော်ကြီးကျောင်းအတွင်း သီလဆောက်တည်ကြသူ ဒေသခံတွေ ရှိနေချိန်မှာ လေကြောင်း တိုက်ခိုက်မှု ပြုလုပ်ခဲ့တာဖြစ်ပြီး အနီးအနားမှာ တိုက်ပွဲ ဖြစ်ပွားမှုလည်း မရှိဘူးလို့ ဒေသခံတွေက ပြောဆိုပါတယ်။
အခုလို လေကြောင်း တိုက်ခိုက်မှုကြောင့် အိမ်ခြေ ၇၀၀ ကျော်ရှိတဲ့ ပန်းအောင်ကျေးရွာခံအများစုဟာ ဘေးလွတ်ရာ ချက်ချင်း ထွက်ပြေးတိမ်းရှောင်ခဲ့ရတယ်လို့ သိရပါတယ်။
