ပို့လဘား၊ ဖေဖော်ဝါရီ ၂၇ ရက်၊ ၁၀၅ မိုင်
ရှမ်းမြောက် မူဆယ် ၁၀၅ မိုင်မှာ သားအဖ ၂ ဦး ဆိုင်ကယ် တိမ်းမှောက်လို့ အဖေဖြစ်သူက သေဆုံးခဲ့ပြီး သားဖြစ်သူက ထိခိုက်ဒဏ်ရာ ရရှိခဲ့တယ်လို့ သွားရောက် ကူညီပေးခဲ့သူတစ်ဦးက ရွှေဖီမြေကို ပြောပါတယ်။
မနေ့ ဖေဖော်ဝါရီ ၂၆ ရက် နေ့လယ် ၁၂ နာရီခွဲမှာ အသက် ၃၂ နှစ်အရွယ် ကိုဟောင်းခေါင်ဟာ ၄ နှစ်အရွယ် သားဖြစ်သူနဲ့ မူဆယ်မြို့ကနေ ဆွန်လန်းရွာဘက် ပြန်လာတဲ့အချိန် ၁၀၅ မိုင် ရွှေစတားထက်ဆီဆိုင်ရှေ့မှာ တိမ်းမှောက်ခဲ့တာလို့ ပြောပါတယ်။
“မူဆယ်ကနေ ပြန်လာတာ။ လမ်းဖြောင့်ကြီးမှာ သူ့ဟာသူ လဲကျတာ။ ချောက်ထဲလည်း မဟုတ်။ ဆိုင်ကယ်လဲလို့ သေတာ မဟုတ်ဘူး။ သူ့ဘာသူ တစ်ခုခုဖြစ်ပြီး လဲကျသေတာ။ အရက်သေစာလည်း မသောက်ထားဘူး။ ရုတ်တရက် သတိလစ်ပြီး သေသွားတာထင်တယ်”
မိုင်းယု ၁၀၅ မိုင်မှာရှိတဲ့ ပါရမီ လူမှုကူညီရေးအသင်းက သွားရောက် ကူညီပေးခဲ့တယ်လို့ အထက်ပါ အမျိုးသားက ဆက်ပြောပါတယ်။
ပြီးခဲ့တဲ့ ဖေဖော်ဝါရီ ၂၃ ရက်ကလည်း Honda Fit မော်တော်ယာဉ်တစ်စီးက မူဆယ် ၁၀၅ မိုင်ကနေ ဟိုနောင်ရွာသို့ ပြန်လာစဥ္ ကားအရှိန် မထိန်းနိုင်ဘဲ ဓာတ်တိုင် ဝင်တိုက်မိခဲ့လို့ ၁ ဦး သေဆုံးပြီး ၂ ဦး ဒဏ်ရာ ရခဲ့ပါတယ်။
